Atyraýda qaǵaz ben esepke kómilgen dırektorlar qaýipsizdik máselesin kóterdi
ATYRAÝ. KAZINFORM – Atyraý oblysynda mektep dırektorlary bilim berý uıymdaryndaǵy qaýipsizdik máselelerin kóterip, sapaly kúzet qyzmetin kúsheıtýdi surady.
Óńirde mektep qaýipsizdigi men jasóspirimder arasyndaǵy quqyq buzýshylyq ózekti máselege aınalyp otyr. Osyǵan baılanysty ótken kezdesýde bilim berý uıymdarynyń basshylary oblys ákimi men PD bastyǵyna birqatar túıtkildi máseleni ashyq aıtty.
Mektep dırektorlarynyń sózinshe, búgingi tańda kúzet qyzmetiniń sapasy syn kótermeıdi. Memlekettik satyp alý arqyly keletin kompanııalardyń múmkindigi shekteýli, al tómen jalaqy bilikti mamandardy tartýǵa kedergi keltirip otyr.
Jylyoı aýdanyndaǵy M.Áýezov atyndaǵy №4 orta mekteptiń dırektory Symbat Qabdirahmanova bul máseleni naqty mysalmen túsindirdi.
— 85 myń teńge jalaqyǵa otbasy asyrap otyrǵan 25 pen 50 jastaǵy azamattar kelip jumys istemeıdi. Biz konkýrs jarııalasaq ta, mamandandyrylǵan kúzet kelmeıdi. Al basqa kompanııalardan bas tartsaq, mektepti kim kúzetedi? Shtatta vahter joq, bul — úlken problema, — dedi ol.
Aýyl mektebiniń basshysy áli kúnge qaǵazbastylyqtan qutyla almaı otyrǵandaryn, sońǵy ýaqytta áleýmettik jelige salynǵan foto-vıdeolardyń esebi qosylǵanyn aıtty.
— Qaǵaz ben fotodan bas kóterýge ýaqyt joq. Taǵy bir másele. Kameralardy kúzet qyzmeti men mektep dırektory ǵana kóre alady. Basshyda kamera qarap otyrýdan basqa jumys jetip artylady. Bilim ordalarynda kameralardy qarap otyratyn mamanǵa shtat qaralmaǵan, — Symbat Qabdirahmanova.
Al Atyraý qalasyndaǵy № 24 mekteptiń dırektory Álııa Edilbaeva mektep basshylyǵynyń moınyndaǵy aýyr júkke toqtaldy. Onyń aıtýynsha, birneshe jyl buryn osy taqyrypta ótken jıyn kezinde kúzeti qyzmetin uıymdastyrý jumysyn mektepten alyp tastaý týraly usynys aıtylǵan. Bul usynys áli qoldaý tappaı keledi.
— Kúzet fırmalary tenderge qatysqan kezde baǵany túsirip tastaıdy. Eń tómengi kórsetkishpen utyp alǵan kompanııa sapaly qyzmet kórsetpeıdi. Al eń sońynda mektep dırektory kináli bolady. Bul jerde eskeretin taǵy bir mańyzdy jaıt bar. Qazir balaǵa birdeńe bolǵan jaǵdaıda býllıng, mektep durys jumys istemeıdi dep jatady. Bilim oshaǵynda 7 sabaq ótedi. 7 sabaqtan keıin qandaı tárbıe jumysy ótedi? Búginde bizder balany emes, ata-anany tárbıelep jatyrmyz. Ata-analar biz jasap jatyrǵan eskertýdi qabyldamaı, basqarmadaǵy basshylyqpen qorqytady, – dedi Álııa Edilbaeva.
Sondaı-aq mektep basshylary ıývenaldy polıtsııa qyzmetkerleriniń jumysyna toqtaldy. Búginde bir qyzmetker birneshe bilim ordasyna jaýap beretindikten tártip máselesi týyndap otyr.
— Oblys boıynsha mektepterge 340 ıývenaldy polıtsııa qyzmetker bekitilgen. Olar da túngi kezekshilikten shyǵady. Jedel ýákilder, ýchaskelik ınspektorlar mekteptiń barlyq sıgnalyna áreket etýge daıyn, — dedi PD bastyǵy Ońal Bekeev.
Kezdesý barysynda jasandy ıntellektke negizdelgen qaýipsizdik júıesi de tanystyrylǵan. Alaıda dırektorlar aýyl mektepterindegi ınternet sapasyn eskerip, mundaı tehnologııalardyń tıimdiligine kúmán keltirdi.
Resmı derekterge sáıkes, jyl basynan beri oblysta 117 jasóspirimniń qatysýymen 120-ǵa jýyq quqyq buzýshylyq tirkelgen. Onyń basym bóligi — usaq buzaqylyq pen urlyq. Jyl basynan beri mektep qabyrǵasynda 2 aýyr qylmys tirkeldi Sonymen qatar óńirde 150-ge jýyq jasóspirim ishki ister organdarynyń esebine alynǵan.
Atyraý oblysynda 115 memlekettik mekteptiń 27-sinde ǵana kúzet qyzmeti talapqa saı uıymdastyrylǵan.