Atyraýda jaǵajaılar ashylmasa da Jaıyqqa sýǵa túsetinder kóbeıgen

ATYRAÝ. KAZINFORM — Atyraý qalasynda jaǵajaılar áli ashylǵan joq. Biraq, Jaıyq ózenine sýǵa túsetin turǵyndar kóbeıip tur.

Osyǵan oraı Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar toby turǵyndarǵa sýdaǵy qaýipsizdik erejelerin saqtaýdy eskertti. 

— Atyraý qalasynyń aýmaǵyndaǵy belgilengen jaǵajaılar resmı túrde ashylǵan joq. Qazir «Turǵyndar úı qalashyǵy» shaǵyn aýdanyndaǵy «Malıbý» jaǵajaıy sýǵa túsýge arnalǵan arnaıy oryndardyń talaptaryna sáıkes daıyndalyp jatyr. Jaǵajaı áli tolyq daıyn emes, talapqa saı emes. Sol sebepten, turǵyndardan jaǵajaı resmı túrde ashylmaıynsha, sýǵa shomylýdan bas tartý suralady, — dep habarlady departamenttiń ımıdjdik jumys jáne syrtqy kommýnıkatsııalar toby.

Al, Atyraý qalalyq qarjy bólimi basshysynyń orynbasary Gúljan Qulbaeva 2 jaǵajaıdyń daıyndalyp jatqanyn habarlady. 

Onyń biri «Turǵyn úı qalashyǵy» shaǵyn aýdanyndaǵy «Malıbý» jaǵajaıy. Al ekinshi jaǵajaı «Atyraý» dene shynyqtyrý-saýyqtyrý kesheni janynda ornalasqan.

— Bul jaǵajaılar 10 jyl merzimge senimgerlik basqarýǵa beriledi. Jaǵajaılar boıynsha ashyq tender jarııalandy. Onyń qorytyndysymen «Malıbý» jaǵajaıyn senimgerlikpen basqarý quqyǵy jeke tulǵa Ahmanov Jomartqa, al, ekinshi jaǵajaı «NA Pallet Group» JShS-ǵa berildi. Qazir jeńimpaz taraptarmen jaǵajaılardy senimgerlik basqarýǵa berý jónindegi kelisimshart jasaqtalyp jatyr, — dep habarlady Gúljan Qulbaeva.

Onyń deregine qaraǵanda, kelisimshart jasaqtalǵan soń jaǵajaılardy abattandyrý, yńǵaıly ári qaýipsiz demalys aımaǵy retinde ashý kózdelip otyr. 

— Jobanyń maqsaty — jaǵajaılardy senimgerlik basqarýǵa berý arqyly sapaly qyzmet kórsetý deńgeıin arttyrý, turǵyndar úshin jaıly ári qaýipsiz demalys ornyn qalyptastyrý. Eki jaǵajaıdyń túbi Atyraý oblystyq tótenshe jaǵdaılar departamentiniń súńgýirleri tarapynan tekserildi. Qazir jaǵajaı aýmaqtarynda tazalaý jáne kógaldandyrý jumystary júrgizilip jatyr. Shomylý maýsymynda jaǵajaı aýmaǵynda sanıtarııalyq talaptarǵa saı jaǵdaı jasalyp, qaýipsizdik sharalary kúsheıtiledi. Demalýshylarǵa qolaıly ınfraqurylym men túrli oıyn-saýyq orny usynylady, — deıdi Gúljan Qulbaeva.

Eske sala ketelik, budan buryn Atyraý oblysynda shomylý maýsymy qashan ashylatyny belgisiz ekenin jazǵan bolatynbyz. 

Keıin Atyraýda Jaıyq ózenine batyp bara jatqan áıel qutqarylǵanyn habarlaǵan edik.