Atyraýda ıtti kúrekpen aıaýsyz urǵan áıelge qatysty qylmystyq is qozǵaldy
ATYRAÝ. KAZINFORM – Atyraýda aýlasyndaǵy ıtti kúrekpen birneshe ret urǵan áıeldiń is-áreketine qatysty qylmystyq is qozǵaldy.Áleýmettik jelide taraǵan vıdeodan kelinshek baılaýly turǵan úı janýaryn kúrekpen aıaýsyz uryp, jaraqattaǵanyn kórýge bolady.
31 naýryz kúni shamamen saǵat 17:30-da polıtsııaǵa úı janýaryna qatygezdik kórsetý faktisi týraly habarlama túsken. Oqıǵa ornyna jetken tártip saqshylary kórsetilgen mekenjaıdan 39 jastaǵy áıeldi anyqtaǵan.
Polıtsııa qyzmetkerleriniń málimetinshe, olar kelgen kezde áıel qarsylyq kórsetip, zańdy talaptardy oryndamaǵan. Osyǵan baılanysty ol polıtsııa qyzmetkerleriniń zańdy qyzmetine kedergi keltirgeni úshin ákimshilik jaýapkershilikke tartyldy.
Sonymen qatar janýarlarǵa qatygezdikpen qaraý faktisi boıynsha qylmystyq is qozǵaldy. Zardap shekken janýarǵa qajetti veterınarııalyq kómek kórsetilgen.
- Qazirgi ýaqytta oqıǵanyń barlyq mán-jaıy anyqtalyp jatyr. Janýarlarǵa qatygezdikpen qaraý — turmystyq «janjal» emes, qylmystyq jaýapkershilikke ákep soǵatyn quqyqbuzýshylyq. Mundaı barlyq faktige quqyqtyq baǵa beriletin bolady, - dep málimdedi PD baspasóz qyzmeti.
Eske salaıyq, byltyr Atyraýda 10 myńǵa jýyq buralqy ıt aýlanǵanyn jazǵan edik.
