Atyraýda ıt ólekseleri kómýsiz qalǵan: ákimdik túsinikteme berdi
ATYRAÝ. KAZINFORM – Atyraý qalasynyń aýmaǵynda ıtterdiń ólekseleri kómilmegen kúıi qazylǵan shuńqyrda jatqany týraly beınejazba kóptiń alańdaýshylyǵyn týǵyzdy. Beınejazba avtorynyń aıtýynsha, janýarlardyń óleksesi mal qorymynyń mańynda jatyr.
Belsendi Lýnara Maqsutova qala ákimdigi men turǵyn úı-kommýnaldyq sharýashylyq salasyna jaýapty bólimge buǵan deıin ótinish joldaǵanyn, alaıda áli kúnge deıin jaýap almaǵanyn aıtady.
Sondaı-aq janýarlardyń óleksesin kómýge kim ruqsat bergeni, ótinishten keıin qandaı tekserý júrgizilgeni jáne veterınarııa qyzmeti ólekselerge zertteý jasaǵan-jasamaǵany týraly suraqtar kóterilgen.
Áleýmettik jelide taraǵan beınejazbaǵa qatysty qala ákimdigi túsinikteme berdi.
Resmı málimetke sáıkes, ólekselerdi aýmaqqa kim ákelip tókkeni ázirge belgisiz.
- Atalǵan aýmaq tazartylyp, tıisti sharalar qabyldandy. Anyqtalǵan kemshilikter nazarǵa alynyp, másele baqylaýǵa alyndy,-dep habarlady Atyraý qalasynyń ákimdigi.
Bir qyzyǵy, qazirgi ýaqytta qala bıligi tarapynan oblys ortalyǵynda buralqy ıtterdi aýlaý jumysy toqtap tur.
Shilde aıynda qalalyq ákimdik jyl sońyna deıin 1100 ıtti aýlaýǵa múmkindik beretin tenderdi qorytyndylap, kelisimshart jasaıtynyn málimdegen edi.
- Qazir ıtterdi aýlaý boıynsha jańa konkýrs uıymdastyrylý ústinde. Konkýrs jeńimpazy anyqtalǵannan keıin qańǵybas ıtterdi aýlaý jumystary júrgiziledi,-dep tolyqtyrdy qalalyq ákimdiktiń baspasóz qyzmeti.
Eske salaıyq, qalalyq ákimdik buralqy ıtterdi aýlaý jáne joıý jumysyna bıyl naýryzda kiristi. Mamyr aıyna deıin 3 myńǵa jýyq ıt aýlandy.
