Atyraýda ınternettegi alaıaqtyq qylmysy 30 paıyzǵa artyp, 920 deregi tirkelgen

ATYRAÝ. KAZINFORM — Atyraý oblysynda jyl basynan beri ınternettegi alaıaqtyq qylmysynyń 30 paıyzǵa artqany anyqtalyp otyr. Osy kezge deıin atalǵan qylmystyń 920 deregi tirkelgen.

Atyraý oblystyq polıtsııa departamenti kıber qylmysqa qarsy kúres tobynyń aǵa jedel ýákili Ashat Nurmanovtyń aıtýynsha, ınternet arqyly jasalatyn alaıaqtyq qylmysyna birneshe jaıt áser etedi. 

«Birinshiden, alaıaqtar qupııa aqparatqa qol jetkizý túrli jolyn biledi. Ekinshiden, onlaın qyzmet kórsetý, taýarlardy onlaın satyp alýdyń zardaby bar. Úshinshiden, jalǵan bankter men mobıldi baılanys operatorlarynan habarlama jiberý — ınternet arqyly qylmys jasaıtyndardyń negizgi ádisteriniń biri. Atyraý oblysynda jyl basynan beri osyndaı tásilder arqyly jasalǵan ınternettegi alaıaqtyq qylmysynyń 920 deregi tirkeldi», — deıdi Ashat Nurmanov. 

Onyń pikirine súıensek, oblysty ınternet alaıaqtyqtyń aldyn alýdyń júıeli jumysy qolǵan alynǵan. 

«Alaıda, zań buzýshylyqtar azaımaı tur. Basqa memlekettiń aýmaǵynda otyrǵan alaıaqtar jańa hakerlik qosymshalardy jıi paıdalanady. Osy kezge deıin anyqtalǵan qylmystyń 106-sy sotqa joldandy. Áli de tergelip jatqan qylmystyq ister bar. Alaıaqtardyń qurbany bolǵandardyń basym bóligi — 25-45 jas aralyǵynda býynnyń ókilderi», — dep málim etti Ashat Nurmanov.

Eske sala ketelik, budan buryn Atyraýda 74 alaıaqtyq qylmysyn jasaǵan 11 adamnyń isi sotqa joldanǵanyn jazǵan bolatynbyz.