Atyraýda HQO-da quqyq qorǵaý organdary tergeý júrgizip jatyr
ATYRAÝ. KAZINFORM — Atyraýdaǵy halyqqa qyzmet kórsetý ortalyqtarynyń birinde jer ýchaskelerine qatysty operatsııalarǵa baılanysty protsessýaldyq is-sharalar júrgizilip jatyr. Tergeý aıasynda birneshe qyzmetkerden túsinikteme alynyp, elektrondyq qurylǵylar tekserýge alynǵan.
Aldyn ala málimet boıynsha, baılanys quraldary tekserýge alynǵan azamattar qatarynda fılıal basshysy, jyljymaıtyn múlik pen jer ýchaskelerin tirkeýmen aınalysatyn qyzmetkerler bar. Tergeý áreketteri kýágerlerdiń qatysýymen júrgizilgen. Qyzmetkerlerdiń is boıynsha kýá retinde jaýap berip jatqany belgili boldy. Tekseris jer ýchaskelerine qatysty aqparattyq júıelerdegi derekterge ózgerister engizý jaǵdaılaryna baılanysty bolýy múmkin. Osy jaǵdaıǵa baılanysty «Azamattarǵa arnalǵan úkimet» memlekettik korporatsııasy resmı túsinikteme berdi.
— Qazirgi ýaqytta Qazaqstan Respýblıkasynyń qoldanystaǵy zańnamasy aıasynda ýákiletti organdar tarapynan protsessýaldyq is-sharalar júrgizilip jatyr. Memlekettik korporatsııa óz quzyreti sheginde ýákiletti organdarǵa tıisti járdem kórsetip keledi. Atalǵan másele boıynsha ózge aqparat qazirgi ýaqytta jarııalaýǵa jatpaıdy, — dep málimdedi korporatsııanyń baspasóz qyzmeti.
Sondaı-aq memlekettik korporatsııa sybaılas jemqorlyqqa múldem tózbeýshilik qaǵıdatyn ustanatynyn atap ótti. Resmı derekke súıensek, osy jyldyń alǵashqy bes aıynda «Azamattarǵa arnalǵan úkimet» Memlekettik korporatsııasy quqyqtyq baǵa berý jáne protsessýaldyq sheshim qabyldaý úshin quqyq qorǵaý organdaryna 23 materıal joldaǵan.
Buǵan deıin UQK Atyraý qalasy ákiminiń orynbasaryna qatysty tergeý júrip jatqanyn rastaǵanyn jazǵan edik.
