Atyraýda hırýrg patsıentterden 8 mln teńgeden astam qarajatty zańsyz alǵan degen kúdikke ilindi
ASTANA. KAZINFORM — Ota úshin naýqastardan MÁMS esebinen tólengen qarajat qaıta alynǵan.
QMA Atyraý oblysy boıynsha departamenti alaıaqtyq jáne zańsyz materıaldyq syıaqy alý faktileri boıynsha kúdikke ilingen hırýrg-dárigerge qatysty tergep-tekserýdi aıaqtady.
— Tergeý amaldaryna saı, kúdikti 2023–2025 jyldar aralyǵynda «Family Health Clinic» JShS men «Kım V.» JK klınıkasynda jumys isteı otyryp, patsıentterden varıkoz aýrýyna jasalatyn operatsııalardyń MÁMS sheńberinde tegin júrgiziletini týraly aqparatty jasyrǵan jáne kórsetilgen qyzmetter úshin tólemdi óziniń banktik shottaryna qabyldap otyrǵan.
Sonymen qatar, «DamuMed» júıesine patsıentterge tegin medıtsınalyq kómek kórsetilgeni týraly málimetter engizilip, sonyń negizinde medıtsınalyq uıymdar Áleýmettik medıtsınalyq saqtandyrý qorynan qarjylandyrý alǵan, — delingen QMA habarlamasynda.
Osylaısha, bir medıtsınalyq qyzmet úshin tólem eki ret júrgizilgen: bir jaǵynan MÁMS qarajaty esebinen, ekinshi jaǵynan patsıentterdiń óz qarajaty arqyly.
— Kúdikti 42 patsıenttiń 8 mln teńgeden astam qarajatyn zańsyz ıemdengen. Al kórsetilgen medıtsınalyq qyzmetter úshin medıtsınalyq uıymdarǵa qor tarapynan 14,8 mln teńgeden astam qarajat aýdarylǵan, — delingen habarlamada.
Budan bólek, onyń qyzmettik mindetterin oryndaǵany úshin patsıentterden zańsyz aqshalaı syıaqy alǵan faktileri de anyqtaldy.
Kúdiktige qatysty elden ketpeý jáne tıisti minez-qulyq týraly qolhat túrindegi bultartpaý sharasy qoldanyldy.
Qylmystyq is sotqa joldandy.
Aıta ketelik MÁMS aıasyndaǵy qyzmet kórsetýshilerge jańa talaptar engiziletini týraly jazǵan edik.
