Atyraýda halyqaralyq «Qazynaly Kaspıı» festıvali ótip jatyr
ATYRAÝ. KAZINFORM – Atyraý qalasynda «Qazynaly Kaspıı» halyqaralyq balyq festıvali ótip jatyr. Іs-shara Kaspıı mańy elderiniń mádenıeti, balyq sharýashylyǵy jáne gastronomııalyq dástúrleri keńinen nasıhattalýda.
Basty maqsat – Kaspıı óńiri elderiniń mádenı baılanysyn nyǵaıtý, sý bıoresýrstaryn saqtaý, balyq sharýashylyǵy men akvamádenıet salasyn damytý baǵyttaryn ilgeriletý.
Іs-shara aıasynda óńir turǵyndary men qonaqtaryna arnalǵan aýqymdy baǵdarlama usynyldy. Balyq ónimderiniń jármeńkesinde Atyraý oblysynda jumys isteıtin jetekshi balyq sharýashylyǵy jáne balyq óńdeý kásiporyndary óz ónimderin usyndy. Kelýshiler sazan, kókserke, aqmarqa, jaıyn sekildi jergilikti balyq túrleri men bekire ónimderiniń alýan túrin satyp alýǵa múmkindik aldy.
Festıval aıasynda aspazshylar arasynda aspazdyq sheberlik baıqaýy uıymdastyryldy. Qatysýshylar Kaspıı óńiriniń jergilikti balyq ónimderinen avtorlyq taǵamdar ázirlep, kásibı sheberlikteri men kreatıvtiligin kórsetti. Baıqaý barysynda taǵamdardyń dámdik sapasy, usynylý mádenıeti jáne tehnologııalyq oryndalýy baǵalandy.
- Balyqtan túrli taǵam túrin jasaýǵa bolady. Búgin 9 aspaz úsh topqa bólinip, tiskebasar,sorpa men ekinshi tamaq pisirip jatyr.Olar 45 mınýt ýaqyt beriledi. Qatysýshylardyń jumysyna elimizdiń Almaty,Astana sııaqty qalalarynan kelgen bas aspazdardan quralǵan qazylar alqasy baǵa beredi,-dedi osy saıystyń uıymdastyrýshysy Baǵdat Qadyrov.
Sondaı-aq jastarǵa arnalǵan bı baıqaýy ótip, zamanaýı bı óneri boıynsha saıys uıymdastyryldy. Qatysýshylar qazylar alqasynyń baǵalaýymen óz sheberlikterin kórsetti.
Balalarǵa arnalǵan teatrlandyrylǵan qoıylym kórsetilip, tabıǵatty qorǵaý, Kaspıı teńiziniń baılyǵy men ekologııalyq mádenıet taqyryptary kórkem túrde jetkizildi.
Ekologııalyq aktsııa aıasynda Jaıyq ózenine 7 myńǵa jýyq bekire tuqymdas shabaq jiberildi. Bul shara sý bıoresýrstaryn saqtaý jáne balyq qoryn kóbeıtý maqsatynda júzege asyryldy.
Uıymdastyrýshylardyń aıtýynsha, festıval Kaspıı óńiriniń tabıǵı baılyǵyn dáriptep, balyq sharýashylyǵy salasyn damytýǵa jáne óńirdiń týrıstik áleýetin arttyrýǵa baǵyttalǵan mańyzdy alań bolyp tabylady.
Atyraýda Jaıyq ózeninde 50-ge jýyq keme qatysqan sherý ótti.
