Atyraýda Halyqaralyq áıelder kúnine arnalǵan saltanatty shara ótti
ATYRAÝ. KAZINFORM - Atyraýdaǵy Mahambet atyndaǵy akademııalyq qazaq drama teatrynda ótken saltanatty jıynda oblys ákimi Serik Shápkenov aımaqtyń damýyna úles qosyp júrgen qyz-kelinshekterdi Halyqaralyq áıelder kúnimen quttyqtady.
— Qazaq halqynda «Jumaq – ananyń tabanynyń astynda» degen dana sóz bar. Ata-babamyz álimsaqtan áıel zatyn ardaqtap, anany aıryqsha qadir tutýǵa tárbıeledi. Ómirlik qundylyqtar analardan sińedi, bilim men adamgershilik qaǵıdalary ananyń aqylymen daryp, bolashaqtyń irgesi qalanady,-dedi oblys ákimi.
Elimizdiń tarıhyndaǵy qıyn-qystaý kezeńderde qazaq áıelderi erlermen birge batyldyq pen janqııarlyq tanytty. Otanǵa degen adaldyqtyń sımvolyna aınalǵan Álııa Moldaǵulova, Mánshúk Mámetova jáne Hıýaz Dospanovanyń erligi soǵan aıqyn dálel.
Búgingi beıbit zamanda da áıelder qoǵam ómiriniń barlyq salasynda – bilim, medıtsına, ǵylym, mádenıet, bıznes jáne memlekettik basqarý salalarynda tabysty eńbek etip, el damýyna zor úles qosýda. Buǵan qosa, áıel-analar urpaq tárbıesiniń tizginin berik ustap keledi.
-Ólkemizdiń áıelder qaýymyn Halyqaralyq áıelder kúnimen shyn júrekten quttyqtaımyn! Barshańyzǵa zor densaýlyq, amandyq, otbasy baqytyn, jarqyn jetistikter tileımin, — dedi oblys basshysy.
Saltanatty jıyndy túrli sala ókilderine memlekettik nagradalar men oblys ákiminiń alǵys hattary tabystaldy.