Atyraýda gazǵa qosylmaǵan 30 páter 600 mln teńgege satyp alynǵan
ATYRAÝ. KAZINFORM – Atyraý oblysynda qurylys salasyna bıýdjet qarajatyn jumsaý kezinde eki zańbuzýshylyq anyqtaldy. Qurmanǵazy aýdanynda 600 mln teńgege satyp alynǵan 30 páter gaz jelisine qosylmaǵany anyqtalsa, Qyzylqoǵa aýdanynda oryndalmaǵan jumystar úshin merdigerge 900 myń teńge aýdarylǵan.
Atyraý oblysynyń prokýratýrasynyń málimetinshe, birinshi jaǵdaı Qurmanǵazy aýdanynda bolǵan. 2024 jyly aýdandyq qurylys bólimi Qurmanǵazy aýylynan 30 páterdi 600 mln teńgege satyp alǵan. Alaıda satyp alynǵan úılerdiń gaz jelilerine qosylmaǵany anyqtalǵan.
- Bólim basshysy bul týraly satyp alý ótkizilgenge deıin-aq bilgen, biraq tenderdi báribir jekelegen kásipkerlerdiń paıdasyna uıymdastyrǵan, - dep habarlady oblys prokýratýrasy.
Ekinshi jaǵdaı Qyzylqoǵa aýdanynda anyqtalǵan. Aýdandyq qurylys bóliminiń basshysy merdigerge naqty oryndalmaǵan jumys úshin 900 myń teńge aýdarǵan.
Atalǵan eki jaǵdaı boıynsha kináli laýazymdy tulǵalardyń áreketi Ádep jónindegi keńestiń otyrysynda qaralǵan.
Nátıjesinde Qurmanǵazy aýdandyq qurylys bóliminiń basshysy memlekettik qyzmetke kir keltiretin tártiptik teris qylyq jasaǵany úshin qyzmetinen bosatyldy. Al Qyzylqoǵa aýdanyndaǵy qurylys bóliminiń basshysyna qyzmetke tolyq saı emestigi týraly eskertý jarııalandy.
Prokýratýranyń habarlaýynsha, óńirde osyndaı buzýshylyqtarǵa jol bergen taǵy úsh laýazymdy tulǵa tártiptik jaýaptylyqqa tartylǵan.
Buǵan deıin eki ret vıza ala almaǵan qytaılyq ınvestorǵa prokýratýra kómekteskenin jazǵan edik.
