Atyraýda Formula-1 deńgeıinde avtotrassa ashylady

ASTANA. KAZINFORM — Atyraýlyq kásipker áleýmettik jaýapkershilik aıasynda avtosport keshenin salyp jatyr. Onyń jastarǵa qanshalyqty qoljetimdi bolatynyn óńir ákimi Serik Shápkenov aıtyp berdi.

Ákimniń aıtýynsha, Texol Motorland Atyrau keshenin kásipker Shota Abhazava óz bastamasymen jáne óz qarajatyna salyp jatyr. 

- Kásipkerdiń ózi avtojarystarǵa qatysady, osy hobbımen belsendi aınalysady jáne ıdeıany da ózi usynǵan bolatyn. Qazir ákimdik qajetti jer aýmaǵyn berdi, bul jerde ıtalııalyq sáýletshiler men trassalardy jobalaýshy mekeme tartylyp, zerdeleý jumystary bastaldy. Bul Atyraýdyń týrızmine erekshe úles qosatynyna senimdimin, — dep jaýap berdi ákim Ortalyq kommýnıkatsııalar qyzmetinde tilshi suraǵyna. 

Sonymen birge, ákim jastardyń kóshede zańsyz jarystar uıymdastyratynyn da atap ótti. 

— Bul suraqty ınvestordyń ózine de qoıǵanmyn. Óıtkeni jastardyń ózi jınalyp, zańsyz jarystar uıymdastyrady, apatqa ushyramasyn dep oılaımyz. Osy trassanyń ishinde jastarǵa bar múmkindik beriledi. Biraq mindetti túrde qaýipsizdikke qatysty oqýlar, qajetti kostıýmder bolady. Jobanyń ishinde bári qarastyrylǵan. Shamamen 2-3 jylda joba qurylysy aıaqtalady, — dedi S. Shápkenov. 

Buǵan deıin Serik Shápkenov Atyraýǵa 83 myńnan astam týrıst kelgenin aıtqan edi. Ásirese, ortaǵasyrlyq Saraıshyq pen Qıǵash ózenindegi Lotos alqaby týrızmdi damytýdaǵy basty baǵyttarǵa aınalǵan.