Atyraýda et qanshadan satylyp jatyr
ATYRAÝ. KAZINFORM – Atyraý oblysynda et baǵasy aıtarlyqtaı ózgergen joq. Mamandardyń málimetinshe, óńirdegi naryq turaqty, al baǵaǵa kúndelikti monıtorıng júrgizilip keledi.
Atyraý oblysy boıynsha Saýda jáne tutynýshylardyń quqyqtaryn qorǵaý departamentiniń deregine sáıkes, óńirde sıyr etiniń tós bóligi 3500–3700 teńge, al san eti 3800–4100 teńge aralyǵynda satylyp jatyr. Jylqy etiniń baǵasy 3800–4000 teńge bolsa, qoı etiniń kelisi 3000–3500 teńgeden saýdalanýda.
Departament mamandarynyń aıtýynsha, áleýmettik mańyzy bar azyq-túlik taýarlarynyń baǵasynda aıtarlyqtaı ósim tirkelmegen. Keıbir ónimderdiń quny maýsymdyq erekshelikter men logıstıkalyq shyǵyndarǵa baılanysty ýaqytsha ózgerýi múmkin.
Óńirde baǵa turaqtylyǵyn qamtamasyz etý maqsatynda kún saıyn monıtorıng júrgizilip, baqylaý jumystary jergilikti atqarýshy organdarmen birlesip júzege asyrylady. Jyl basynan beri áleýmettik mańyzy bar azyq-túlik taýarlaryna zańda belgilengen saýda ústemesin negizsiz asyrǵan 86 kásipkerlik sýbektisine qatysty Qazaqstan Respýblıkasynyń Ákimshilik quqyq buzýshylyq týraly kodeksine sáıkes ákimshilik hattama toltyrylyp, aıyppul salynǵan.
Atyraý oblysy boıynsha saýda jáne tutynýshylardyń quqyqtaryn qorǵaý departamentiniń bas mamany Azamat Álibaevtyń aıtýynsha, óńirdegi et qory jetkilikti ári turaqty jetkizilip otyr.
– Kún saıyn qaladaǵy mal soıý pýnktterinde orta eseppen 60 bas sıyr, 10–20 bas jylqy jáne 15–20 bas qoı soıylady. Mal negizinen Batys Qazaqstan oblysynan, sondaı-aq Atyraý oblysynyń Qyzylqoǵa, Qurmanǵazy jáne Mahambet aýdandarynan jetkiziledi. Jalpy óńirdegi et baǵasy turaqty deńgeıde saqtalyp otyr, – dedi Azamat Álibaev.
Mamannyń málimetinshe, óńirde turǵyndar etti qoljetimdi baǵamen kóbine «Dına» jáne «Saraıshyq» kommýnaldyq bazarlarynan satyp alady. Baǵa monıtorıngi aldaǵy ýaqytta da turaqty túrde jalǵasady.
Buǵan deıin áleýmettik mańyzy bar azyq-túlik taýarlarynyń tizimi keńeıtilgenin jazǵan edik.
