Atyraýda esirtkige táýeldi 533 adam esepke alynǵan
ATYRAÝ. KAZINFORM — Atyraý oblysynda esirtkige táýeldilik boıynsha 533 adam esepte tur. Bıyl bes aıda psıhobelsendi zattardy qoldanýdan densaýlyǵyna zııan kelgen 138 turǵyn mamandar baqylaýyna alynǵan.
Atyraý oblystyq psıhıkalyq densaýlyq ortalyǵynyń basshysy Eldos Qydyrsıhovtyń aıtýynsha, óńirde psıhobelsendi zattardy qoldanýyna baılanysty jalpy 2500-ge jýyq adam mamandardyń baqylaýynda. Onyń ishinde 1953 adam alkogolge táýeldilik boıynsha, al 533 adam esirtki qoldanýyna baılanysty tirkelgen.
— Bıyl bes aı ishinde psıhobelsendi zattardy qoldanǵanynan densaýlyǵyna zııan kelgen 138 adam mamandardyń baqylaýyna alyndy. Onyń 31-i esirtki zattaryn tutynýǵa baılanysty. Nashaqorlyqtyń aldyn alý, erte anyqtaý jáne emdeý baǵytyndaǵy jumystar turaqty júrgizilýde, — dedi Eldos Qydyrsıhov.
Oblystyq psıhıkalyq densaýlyq ortalyǵy basshysynyń málimetinshe, medıtsınalyq-áleýmettik kómek jeti aýdandyq psıhıkalyq densaýlyq kabıneti jáne Atyraý qalasyndaǵy alty emhana janynan ashylǵan bastapqy psıhıkalyq densaýlyq ortalyqtary arqyly kórsetiledi.
Qazirgi ýaqytta oblystyq psıhıkalyq densaýlyq ortalyǵynda narkologııalyq naýqastarǵa arnalǵan 56 tósek-oryn jumys istep tur. Sonymen qatar ınektsııalyq esirtki qoldanatyn azamattarǵa arnalǵan opıoıdty agonıstik qoldaý terapııasy baǵdarlamasy júzege asyrylýda. Atalǵan baǵdarlamaǵa búginde 8 naýqas qatysyp otyr.
Eldos Qydyrsıhovtyń sózinshe, táýeldiligi bar azamattardy qoǵamǵa beıimdeý baǵytynda da naqty jumys istelip jatyr. Bıyl ortalyqtyń kómegimen eki naýqastyń jeke kýáligi qalpyna keltirilip, taǵy eki adam qaıta áleýmettendirý ortalyǵyna ornalastyrylǵan.
Buǵan deıin salynǵanyna 87 jyl bolǵan ǵımaratta jumys istep jatqan Atyraýdaǵy psıhıkalyq densaýlyq ortalyqqa jańa nysan salý máselesi birneshe jyldan beri sheshilmeı kele jatqanyn jazǵan edik.
