Atyraýda esirtki úshin jaýapqa tartylǵandardyń 60 paıyzy – jergilikti turǵyndar

ATYRAÝ. KAZINFORM – Atyraý oblysynda jyl basynan beri esirtkige qatysty 146 quqyq buzýshylyq anyqtalǵan. Osyǵan baılanysty 60 adam jaýapqa tartylǵan. Atyraý oblysy ákiminiń orynbasary Jasulan Bısembıevtiń aıtýynsha, bıyl esirtki taratýǵa qatysy bar adamdar sany artqan. Esirtkige táýeldilerdiń qatary azaımaı otyr. 

«Bıyl oblys aýmaǵynda esirtkimen baılanysty 146 quqyq buzýshylyq anyqtalyp, 60 adam jaýapkershilikke tartyldy. Olar – 16-35 jas aralyǵyndaǵy býynnyń ókilderi. Bul adamdardyń 60 paıyzy – jergilikti turǵyndar. «Kıber-qadaǵalaý» baǵdarlamasy arqyly esirtkini jarnamalaıtyn 150 saıt anyqtalyp, buǵattaldy. Esirtki jarnamasy bar 100-den astam graffıtı joıyldy. Polıtsııa qyzmetkerleri zańsyz aınalymnan 252 keli túrli esirtki zattaryn tárkiledi», - deıdi Jasulan Bısembıev. 

Ákim orynbasarynyń aıtýyna qaraǵanda, jastar men jasóspirimder arasynda túrli aldyn alý sharasy ótkizilgen. Arnaıy daıyndalǵan rolıkter men derekti fılmder kórsetilgen.

«Degenmen, áli de nátıjeli jumystardy atqarýymyz qajet. Bul máseleniń eki taraby bar – taratýshylar men tutynýshylar. Eger birinshi tarappen memleket belsendi kúres júrgizip jatsa, ekinshi tarapty túzeý isine qoǵamnyń atsalysýy asa mańyzdy. Qazir bizge aıqyn bolyp otyrǵany – memlekettik jáne qoǵamdyq qurylymdar birlese jumys atqaryp, esirtkige qarsy turaqty qoǵamdyq ımmýnıtet qalyptastyrýy qajet», - dep málim etti Jasulan Bısembıev. 

Eske sala ketelik, budan buryn Atyraýda er adamnan marıhýananyń 60 dozasy tárkilengenin jazǵan edik. 

Keıin taǵy bir kúdiktiden 200 doza sıntetıkalyq esirtki tárkilendi.