Atyraýda esirtki satqan 3 sheteldik 10 jylǵa sottaldy

ATYRAÝ. KAZINFORM – Atyraýda esirtki satqan 3 sheteldik 10 jylǵa sottaldy. Qylmystyq is sottalýshylardyń ótinishi boıynsha alqabılerdiń  qatysýymen qaraldy.

Atyraý oblysynyń qylmystyq ister jónindegi mamandandyrylǵan aýdanaralyq sotynyń málimetine súıensek, Ózbekstan Respýblıkasynyń 3 azamatyna QR Qylmystyq kodeksiniń 297-babynyń 3-bóliginiń 1 jáne 3-tarmaǵymen aıyp taǵylǵan.

«Sottalýshylar 2023 jylǵy 11 sáýirde satý maqsatynda Ózbekstan Respýblıkasynan Atyraý qalasyna asa iri mólsherde geroın esirtkisin tasymaldaǵan. Esirtkini jalǵa alynǵan páterde saqtaǵan. Sottalýshylar esirtki zatyn zańsyz ótkizýdi jasyryn orynǵa qoıý arqyly júzege asyrǵan. Jalǵa alynǵan páterdi tintý kezinde asa iri mólsherde geroın, az mólsherde apıyn tabylyp, tárkilengen», - dep habarlady sottyń baspasóz qyzmeti.

Sottalýshylardyń kinási kýálardyń jaýaptarymen, saraptama qorytyndylarymen, tergeý áreketteriniń hattamalarymen, fotosýrettermen, mobıldi telefonmen sóılesý áńgimelerimen jáne zattaı aıǵaqtarmen dáleldengen.

Prokýror sottalýshylarǵa 11 jyl merzimge bas bostandyǵynan aıyrý jazasyn taǵaıyndaýdy surady. Alaıda sottalýshylar kinásin tolyǵymen moıyndamaı, ózderin aqtaýdy usyndy.

«Alqabılerdiń sheshimimen sottalýshylar R., B., M. QR Qylmystyq kodeksiniń 297-babynyń 3-bóliginiń 1 jáne 3-tarmaǵymen kináli dep tanyldy. Olardyń árqaısysyna 10 jyl merzimge bas bostandyǵynan aıyrý jazasy taǵaıyndaldy», - dep málim etti sottyń baspasóz qyzmetinen.

Sot úkimi zańdy kúshine engen joq.

Eske sala ketelik, buǵan deıin esirtki tasymaldaǵan atyraýlyq jigit 10 jylǵa sottalǵanyn jazǵan bolatynbyz.