Atyraýda eskertkishtiń astynda qalǵan 7 jasar qyzdyń ólimin tergeý aıaqtalýǵa jaqyn

ATYRAÝ. KAZINFORM — Atyraýda byltyr Jeńis saıabaǵynda 7 jasar qyzdyń ústine eskertkish qulaǵan edi. Aýyr dene jaraqatyn alǵan jasóspirim aýrýhana kóz jumdy.

Oqıǵa byltyrǵy 25 maýsymda bolǵan. Sol kúni keshki saǵat 21:40 shamasynda bastalǵan jańbyrdyń sońy nóserge ulasqan. Jeńis saıabaǵyna serýendeýge kelgen bir otbasynyń 2 balasy eskertkishtiń artyn panalaǵan. 

Sol kezde eskertkish qulap, 7 jasar qyzdy basyp qalǵan. Al onyń qasynda bolǵan 2015 jylǵy baýyrynyń qoly synǵan.

Ekeýi de oblystyq balalar aýrýhanasy jetkizidi. Alaıda 7 jasar qyz aýyr dene jaraqatynyń saldarynan aýrýhanada qaıtys boldy.

Atyraý oblystyq polıtsııa departamentiniń baspasóz qyzmetinen málim etkendeı, atalǵan oqıǵaǵa baılanysty qylmystyq is qozǵalǵan edi. 

— Qazir tergeý aıaqtalýǵa jaqyn. Taraptar is materıaldarymen tanysyp jatyr. Sodan soń qylmystyq istiń materıaldary sotqa joldanady, — dep málim etti departamenttiń baspasóz qyzmeti.

Al kóz jumǵan qyzdyń ákesi Aıdos Sabyrov eskertkishtiń durys bekitilmegenine kináliler jazalanǵanyn qalaıdy.

— Qylmystyq is eskertkishti ornatqan merdigerge qatysty qozǵaldy. Al sol kezde eskertkishti ornatýǵa, ashylýyna jaýapty bolǵandar da jaýap berýi qajet, — deıdi Aıdos Sabyrov.

Eske sala keteıik, byltyr Atyraýda ústine eskertkish qulaǵan 7 jasar qyz qaıtys bolǵanyn jazǵan edik. 

Keıin Atyraýda qulaǵan eskertkishtiń saldarynan 9 jasar balanyń qoly synǵanyn habarlaǵan bolatynbyz.