Atyraýda erekshe balalardyń ata-analary memlekettiń jórgekti tórt bólip berýine qarsy

ATYRAÝ. KAZINFORM — Atyraýda erekshe balalardyń analary memleket tarapynan jylyna bir márte beriletin 1460 jórgektiń toqsanǵa bólinýine qarsy. Olardyń sózinshe, endi analar ár toqsan saıyn Aleumet portaly arqyly 365 jórgekke tapsyrys berip otyrýy tıis.

Jórgektiń toqsan toqsanǵa bólip berilýi onyń sapasyna keri áserin tıgizýi múmkin. Óıtkeni, jetkizýshi mekemeniń tańdaýy ártúrli. 4 toqsanda 4 túrli jetkizýshi qyzmet kórsetýi yqtımal. Jáne gıgıenalyq quraldy jetkizýge aıtarlyqtaı ýaqyt ketedi. Sondyqtan ata-analarǵa jórgektiń tıesili kólemin jylyna bir márte alǵan yńǵaıly.

— 1460 jórgek tórt bólip kelgende sapasy qandaı bolady? Allergııa bolyp qalýy múmkin. Balalarymyzdyń denesine jara shyǵyp kete me degen qaýip bar.Ár balaǵa ártúrli gıgıenalyq zat kerek. Jetkizýshi mekeme arzan jórgekti izdeıtini belgili. 4 túrli kompanııa bizdi jórgekpen qamtýǵa jaýapty bolýy múmkin. Bul da bizdiń ýaıymymyz. Árıne, biz balaǵa qajetti jórgektiń markasyn bekitemiz. Jórgekti tasymaldaý ýaqyty uzarsa, qaltamyzǵa salmaq salady. Jaqyn jerdegi dárihanalardy kezip ketemiz, — dedi ata-ana Gúljan Qusaıynova.

Másele mınıstrlikterge jetsin degen ata-analar memleketten beriletin jórgek jyl boıyna jetpeıdi dep otyr. Óıtkeni erekshe bala kúnine 8-10 dana gıgıenalyq quraldy paıdalanady.

— Jetkiliksiz bolǵandyqtan óz aqshamyzǵa satyp alamyz. Bir úıde birneshe erekshe bala bolýy múmkin. Ata-analar olardy emge alyp barady. Mysaly, ońaltýdyń ózine ana balasymen baryp, 24 kún em-dom alady. Ata-ana ýaqytyn balany emdetýge jumsaı ma, álde jórgek biteıin dep jatyr dep mazasyz degbiri qashyp júrý kerek pe?!, — dedi ata-ana Nazerke Dosqalıeva.

Eńbek jáne halyqty áleýmettik qorǵaý mınıstrligi jórgekterdi toqsan saıyn berý (toqsanyna keminde 360 dana) gıgıenalyq quraldardy jyl boıy birkelki paıdalanýdy qamtamasyz etý, sondaı-aq josyqsyz ónim berýshiler tarapynan bolatyn buzýshylyqtardyń aldyn alý maqsatynda qabyldanǵan sheshim dep túsindirdi.

— Áleýmettik qyzmetter portaly arqyly toqsan saıyn tapsyrys berý usynylatyn taýardyń sapasyn jaqsyraq baqylaýǵa múmkindik beredi: eger taýardyń sapasy kóńilden shyqpasa, kelesi toqsanda alýshy ónim berýshini jedel aýystyra alady. Jyldyq kólemdi birden alǵan jaǵdaıda muny júzege asyrý qıynǵa soǵady. Uzaq jetkizý táýekelderin boldyrmaý jáne qamtamasyz etýdegi úzilisterge jol bermeý maqsatynda mınıstrlik kúni buryn tapsyrys berý mehanızmin qarastyrdy. Qyzmet alýshylar kelesi toqsandyq normaǵa ótinimdi aldyn ala — aldyńǵy tapsyrys berilgen kúnnen bastap 60 kúntizbelik kún ótken soń resimdeı alady, — dep pikir bildirdi QR Eńbek jáne halyqty áleýmettik qorǵaý mınıstrligi.

Mınıstrlik múgedektigi bar balalardy tárbıelep otyrǵan ata-analardyń ótinishterine muqııat qaraıtynyn, Atyraý oblysynyń jergilikti atqarýshy organdary ata-analarmen kezdesýler ótkizip, logıstıkanyń yńǵaılylyǵy men qamtamasyz etý jıiligine qatysty aıtylǵan barlyq ýáj nazarǵa alynǵanyn aıtty.

Resmı málimetke súıensek, mınıstrlik toqsan saıyn qamtamasyz etý mehanızmine keshendi taldaý júrgizip keledi. Osy taldaýdyń qorytyndysy boıynsha, qyzmet alýshylardyń pikirin eskere otyryp, gıgıenalyq quraldardy usyný formaty boıynsha ońtaıly sheshimder qabyldanady dep otyr. Jalpy jyldyq kólem ózgerissiz qalady jáne azamattardyń tıisti ońaltý quraldaryn alý quqyqtary tolyq kólemde qamtamasyz etiledi.

Qazirgi ýaqytta Atyraý oblysynda 27 myńnan astam múmkindigi shekteýli azamat bar. Onyń 4,5 myńy — bala. 3300-ine gıgıenalyq jórgek tıesili.

Buǵan deıin múmkindigi shekteýli azamattarǵa arnalǵan qoljetimdi orta qaǵıdalary bekitilgenin jazǵan edik.