Atyraýda er adamdy soqqyǵa jyqqandarǵa qatysty qylmystyq is qozǵaldy
ATYRAÝ. KAZINFORM – Atyraýda túngi mezgilde er adamdy soqqyǵa jyǵyp ketti. Jergilikti polıtsııa qyzmetkerleri kúsh kórsetýshilerge qatysty qylmystyq is qozǵady.
Áleýmettik jelide taraǵan aqparatqa qaraǵanda, tóbeles Atyraý qalasyndaǵy «Turǵyn úı qalashyǵy» shaǵyn aýdanynda bolǵan. Vıdeoda jigittiń biri jerde jatqan er adamdy tepkeni túsirilgen.
Atyraý oblystyq polıtsııa departamentiniń baspasóz qyzmeti atalǵan derekke qatysty quqyq buzýshylardyń ustalǵanyn málim etti.
– Qazir qylmystyq is tirkeldi. Tergeý amaldary júrgizilip jatyr, - dep málim etti departamenttiń baspasóz qyzmeti.
Al oblystyq densaýlyq saqtaý basqarmasy baspasóz qyzmetiniń aqparatyna súıensek, zardap shekken er adam aýrýhanaǵa jetkizilgen.
– 5 sáýirde túngi saǵat 02:58-de Atyraý qalasynyń S.Saýyrǵalıev kóshesindegi turǵyn úıdiń aldynda bolǵan oqıǵa boıynsha jedel járdem qyzmetine shaqyrtý tústi. Oqıǵa ornyna barǵan jedel járdem brıgadasynyń qyzmetkerleri 1984 jylǵy er adamǵa alǵashqy medıtsınalyq kómek kórsetti. Ol dene jaraqattarymen oblystyq aýrýhanaǵa jetkizildi. Qazirgi kezde naýqastyń jalpy jaǵdaıy – ortasha turaqty, - dep habarlady basqarmanyń baspasóz qyzmeti.
Eske sala ketelik, budan buryn Atyraýda jol apatynan zardap shekken 18 jastaǵy bozbala aýrýhanada kóz jumǵanyn jazǵan edik.