Atyraýda eńbek ınspektsııasynyń bólim basshysy eki kisi ólimin jasyrmaq bolǵan
ASTANA. KAZINFORM – Bólim basshysy jumys ornynda qaıtys bolǵan eki adamnyń ólimine qatysty isti toqtatýǵa baılanysty para berýge ıtermelegen. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.
«Atyraý qalasynyń №2 sotymen oblystyq memlekettik eńbek ınspektsııasy basqarmasynyń bólim basshysy S.Djabasovqa qatysty úkim jarııalandy. Ol kásipkerdiń aqshasyn alaıaqtyq jolmen jymqyrýǵa oqtalǵany jáne óndiriste eki qyzmetkerdiń qaıtys bolýy faktisi boıynsha oǵan qatysty qylmystyq isti toqtatýǵa baılanysty laýazymdy adamdarǵa para berýge ıtermelegeni úshin sottaldy», - dedi Danııar Bıgaıdarov vedomstvoda ótken baspasóz máslıhatynda.
Sondaı-aq, bólim basshysy memlekettik salada laýazymdy qyzmet etý quqyǵynan jáne 4 jylǵa bas bostandyǵynan aıyryldy.
Aıta ketsek, Antıkordyń málimetinshe, sońǵy úsh jylda alaıaqtyq faktileri boıynsha 770 qylmystyq is qozǵalǵan, onyń 122 is para berýge ıtermeleý sanatyna jatady. Respýblıka boıynsha alaıaqtarǵa aldanyp berilgen qarajattyń jalpy somasy 18,9 mlrd teńgeden asyp túsedi.
