Atyraýda emhana qyzmetkerlerine bereshekke baılanysty syıaqy berilmegen

ATYRAÝ. KAZINFORM – Atyraý qalasyndaǵy №4 emhana qyzmetkerlerine kredıtorlyq bereshektiń saldarynan qarjylaı syıaqy berilmegen.

Áleýmettik jelide atalǵan emhana bas dárigeriniń qyzmetkerlerge qarjylaı syıaqy berilmeıtini týraly aýdıosy taraǵan edi. Osyǵan baılanysty Atyraý oblystyq Densaýlyq saqtaý basqarmasynyń baspasóz qyzmeti tómendegideı túsinik berdi.

– Baýyrjan Tólegen 2024 jylǵy 14 aqpanda Atyraý qalasyndaǵy №4 emhana bas dárigeriniń mindetin ýaqytsha atqarýshy bolyp taǵaıyndalǵan. Emhananyń kredıtorlyq bereshegi 635 mln teńgeni qurady. Jyl sońyna deıin bereshektiń 500 mln teńgesi óteldi. Medıtsınalyq mekemeniń qyzmetkerleri 30 jeltoqsanda emhana basshysyna jyl sońyna deıin atqarylǵan jumys qorytyndysymen qarjylaı syıaqy berý týraly máselesimen júgingen. Alaıda emhananyń 135 mln teńge kóleminde ótelmegen kredıtorlyq beresheginiń bolýyna baılanysty syıaqy berý múmkin emes. Densaýlyq saqtaý mınıstrliginiń №238 buıryǵyna sáıkes aqshalaı syıaqylar jáne qosymsha aqshalaı syıaqylar qolda bar qarjylyq resýrstar bolǵan jaǵdaıda beriledi. Bul jóninde qalalyq emhana qyzmetkerlerine túsinik júrgizildi, - dep habarlady basqarmanyń baspasóz qyzmeti.

Eske sala ketelik, budan buryn Atyraý feldsherleri júkti áıeldi úıinde bosandyryp, egizdiń ómirin saqtap qalǵanyn jazǵan bolatynbyz.