Atyraýda elektrondy júkqujatqa qatysty 36 quqyq buzýshylyq anyqtaldy
ATYRAÝ. KAZINFORM – Aımaqta jyl basynan beri aktsızdeletin taýarlarǵa qatysty 9 myńnan astam elektrondy taýarlarǵa arnalǵan ilespe júkqujat rásimdeldi. Qujatty ýaqytyly rásimdemeý nemese rastaý talabyn buzǵan kásipkerlerge jalpy somasy 3 mıllıon teńgege jýyq ákimshilik aıyppul salynǵan.
Atyraý oblysy boıynsha Memlekettik kirister departamentiniń bólim basshysy Aıbek Bahtııarovtyń aıtýynsha, óńirde alkogol ónimderi, janar-jaǵarmaı jáne ózge de aktsız salyǵy salynatyn taýarlardy ótkizetin 1 600-den astam kásipker taýarlarǵa arnalǵan ilespe júkqujat aqparattyq júıesin paıdalanǵan.
– Taýarlarǵa arnalǵan ilespe júkqujat júıesi taýarlardyń qozǵalysyn baqylaýǵa jáne olardyń zańdy aınalymyn qamtamasyz etýge arnalǵan. Sondyqtan aktsız salyǵy salynatyn taýarlarmen jumys isteıtin kásipkerler bul qujatty elektrondy túrde rásimdeýge mindetti, – dedi Aıbek Bahtııarov.
Onyń málimetinshe, jyl basynan beri elektrondy júkqujatty belgilengen merzimde rásimdemeý nemese ýaqytynda rastamaýǵa baılanysty 36 ákimshilik quqyq buzýshylyq anyqtalǵan.
– Nátıjesinde kásipkerlerge jalpy somasy 3 mıllıon teńgege jýyq ákimshilik aıyppul salyndy, – dedi bólim basshysy.
Qazaqstan Respýblıkasynyń Ákimshilik quqyq buzýshylyq týraly kodeksiniń 283-1-babyna sáıkes, elektrondy taýarlarǵa arnalǵan ilespe júkqujatty belgilengen merzimde rásimdemegen kásipkerler ákimshilik jaýapkershilikke tartylady.
Atalǵan bapqa sáıkes, shaǵyn kásipkerlik sýbektilerine 10 AEK, orta kásipkerlik sýbektilerine 20 AEK, al iri kásipkerlik sýbektilerine 30 AEK mólsherinde ákimshilik aıyppul kózdelgen.
Buǵan deıin óndiriske qajetti ımporttyq taýarlar tizimi keńeıtilýi múmkin ekenin jazǵan edik.
