Atyraýda elektrli kólik júrgizýshileri 7 aıda 930 márte jol erejesin buzǵan
ATYRAÝ. KAZINFORM – Atyraý oblysynda jyl basynan beri elektrli kólik júrgizýshileriniń 930 márte jol erejesin buzǵany tirkelip otyr.
Atyraý oblystyq polıtsııa departamenti bastyǵynyń birinshi orynbasary, polıtsııa polkovnıgi Ábdiǵanı Seıdýalıevtiń aıtýynsha, motokólikter men elektrosamokat júrgizýshileri polıtseılerdiń zańdy talabyn oryndamaı, qashyp ketýge tyrysady.
«Sońǵy kezde moped, mototsıkl men skýter júrgizýshileri jasaǵan jol-kólik oqıǵasy jıiledi. Bıylǵy jyl basynan beri elektrli kólikterdiń júrgizýshileri tarapynan 930 quqyq buzýshylyq anyqtaldy. Olarǵa ákimshilik hattama toltyrylyp, 120-dan astam skýter, moped arnaıy turaqqa qoıyldy. Júrgizýshilerdiń basym bóligi jyldamdyq asyryp, basyp ozady. Baǵdarshamnyń qyzyl túsine toqtamaı, qaýipsizdik talaptaryn saqtamaıdy. Tájirıbege súıensek, mundaı kólik túrlerin jasóspirimder júrgizedi. Kámeletke tolmaǵan júrgizýshiler jolda júrý erejelerin buzady», - deıdi Ábdiǵanı Seıdýalıev.
Onyń pikirinshe, jasóspirimderdiń deni mototsıkl, moped pen skýterdi qujatsyz júrgizedi. Ata-analary balalarynyń qaýipsizdigine mán bermeıdi.
«Tek Atyraý qalasynda jyl basynan beri elektrli kólik júrgizýshileri buzǵan 106 jol-kólik oqıǵasy tirkeldi. Jol apatynyń saldarynan 53 adam dene jaraqatyn aldy. Al, 5 adam qaıtys boldy», -dep málim etti Ábdiǵanı Seıdýalıev.
Balasyna moped alyp bergen turǵynnyń biri – atyraýlyq Tımýr Rahıshev. Alaıda, onyń uly bir jyl buryn jol apatyna túsip, dárigerlerge qaralyp júr.
«Ata-ananyń bári balalaryn qýantqysy keledi. Men de bir jyl buryn 14 jastaǵy ulymdy qýantý úshin moped alyp bergen edim. Biraq, balanyń bir kúngi qýanyshyn emes, bolashaǵyn oılaý qajettigin kesh túsinip otyrmyn. Qazir kóshede moped aıdap júrgender jol erejesin jıi buzady. Tipti olardyń júrisinen qorqamyn. Mopedshiler eki kúnniń birinde jol apatyna ushyrap jatyr. Zardap shegetinder de – mopedshiler men skýtershiler. Kóbiniń jasy 18-ge tolmaǵan. Qazir arbada otyrǵan balamdy kórgende, bir kúngi qýanyshy úshin bolashaǵyna balta shaptym-aý dep ókinemin», -deıdi Tımýr Rahıshev.
Eske sala ketelik, buǵan deıin Atyraýda mototsıklmen túıege soǵylǵan jasóspirim oqıǵa ornynda mert bolǵanyn jazǵan edik.
