Atyraýda elektrli kólik júrgizýshileri 6 aıda 105 jol apatyn jasaǵan
ATYRAÝ. KAZINFORM – Atyraýda elektrli kólik júrgizýshileriniń kesirinen 6 aıda jol-kólik oqıǵasynan 53 adam jaraqat alǵan. Al, 5 adam mert bolǵan.
Atyraý qalalyq polıtsııa basqarmasy patrýldik polıtsııa batalonynyń komandıri Dáýren Nasıpollanyń málimetinshe, 6 aıda elektrli kólik júrgizýshileri 105 jol apatyn jasaǵan.
«Qazir skýter, moped, elektrosamokat sekildi elektrli kólikterdi júrgizýshiler tarapynan quqyq buzýshylyq faktileri jıi tirkeledi. Ásirese, turǵyndar kóp shoǵyrlanatyn orynda samokat aıdaǵan jasóspirimder jol tártibin jıi buzady. Kámelet jasyna jetpeı skýter, moped tizgindep,tájirıbeniń azdyǵynan qaıǵyly jaǵdaıǵa dýshar etken oqıǵalar tirkelip otyr. Elektrli kólikterdi júrgizýshiler 930 quqyq buzýshylyq jasady. Olarǵa ákimshilik hattama toltyrylyp, 120-dan astam skýter, moped arnaıy turaqqa qoıyldy», - dep habarlady Dáýren Nasıpolla.
Patrýldik polıtsııa batalonynyń aǵa ınspektory, polıtsııa kapıtany Azamat Nájmedenovtiń málimetine súıensek, 105 jol-kólik oqıǵasynan 53 adam túrli dene jaraqatyn alǵan. Al, 5 adam qaıtys bolǵan.
«Byltyrǵy 29 maýsymda Jol qozǵalysy týraly zańnamaǵa ózgerister endi. Soǵan sáıkes skýter, moped, samokat júrgizýshilerine talap kúsheıtildi. Olardyń jolda júrý erejesin buzǵany anyqtalǵan jaǵdaıda QR Ákimshilik Quqyq buzýshylyq týraly kodeksiniń 127, 440, 620 jáne 593-babyna saı ákimshilik hattama toltyrylady», - dep málim etti Azamat Nájmedenov.
Eske sala ketelik, buǵan deıin Atyraýda mopedpen kólikke soǵylǵan 15 jasar jetkinshektiń anasy aıyppul tólegen jazǵan edik.
Sondaı-aq, kólikke soǵylǵan mopedtiń júrgizýshisi oqıǵa ornynda mert boldy.
