Atyraýda elektr qýatynyń tarıfin ózgertýge sebep faktorlar ataldy
ATYRAÝ. KAZINFORM — Atyraý oblysynda 1 qazannan bastap elektr energııasynyń tarıfi ózgerýi múmkin. «Atyraý Jaryq» JShS turǵyndar úshin tarıfti shamamen 30 paıyzǵa, al zańdy tulǵalar men bıýdjettik uıymdar úshin 34 paıyzǵa kóterýdi usyndy.
Kompanııanyń usynysyna sáıkes, turǵyndar úshin 1 kVt/saǵat elektr energııasynyń quny qazirgi 22,29 teńgeden 28,98 teńgege deıin ósýi múmkin. Al kásipkerler 1 kVt/saǵat úshin burynǵydaı 42,78 teńge emes, 57,46 teńge tóleýi yqtımal. Memlekettik bıýdjetten qarjylandyrylatyn zańdy tulǵalarǵa boljaldyq ósim — 34 paıyz.
Tarıfti qaıta qaraý máselesi jarııa tyńdaý kezinde talqylandy. «Atyraý Jaryq» ókilderiniń aıtýynsha, baǵanyń ózgerýine elektr energııasyn satyp alý qunynyń, ony berý jáne dıspetcherlik qyzmetterdiń qymbattaýy, sondaı-aq syrtqy uıymdardan alynatyn qyzmetter baǵasynyń ósýi áser etken.
Sonymen qatar kompanııada elektr energııasyn ótkizý kóleminiń tómendegenin atap ótti. Buǵan birqatar iri tutynýshynyń naryqtyq saýdaǵa ketýi sebep bolǵan.
Naqtyraq aıtqanda, elektr energııasyn ótkizý kólemi 142,3 mln kVt/saǵatqa tómendegen. Buǵan «Embimunaıgaz» AQ men «Kaspıan Ofshor» JShS-niń kóterme naryqqa aýysýy sebep bolǵan.
Elektr energııasyn satyp alýdyń ortasha ólshemdi baǵasy qurylymynda 1 kVt/saǵatqa 3,17 teńgege (21%) ósý baıqaldy. 2026 jylǵy 1 qańtardan bastap RAO EES Reseı kompanııasynan satyp alynatyn elektr energııasynyń baǵasy 1 kVt/saǵat úshin 7,41-den 8,70 reseı rýbline deıin ósti, bul 17,4%-dy quraıdy.
«Jańartylatyn energııa kózderin qoldaý jónindegi Qarjy-esep aıyrysý ortalyǵy» JShS-niń (ataýly qoldaý) elektr energııasynyń baǵasy 1 kVt/saǵat úshin 13,50-den 16,50 teńgege deıin ósti, ıaǵnı 22%-ǵa artqan.
Elektr energııasyn berý jónindegi qyzmetterdiń ortasha ólshemdi baǵasy 1 kVt/saǵatqa 4,30 teńgege, ıaǵnı 33 paıyzǵa qymbattaǵan.
«Atyraý Jaryq» JShS-niń tarıfi 2026 jylǵy 1 shildeden bastap 1 kVt/saǵat úshin 13,009 teńgeden 17,29 teńgege deıin ósti. Bul «Energetıkalyq jáne kommýnaldyq sektorlardy jańǵyrtý» ulttyq jobasyn júzege asyrýmen baılanysty.
— Elektr energııasynyń baǵasy ósip otyr. Ony berý quny da artty. Sonymen qatar «KEGOC» AQ-tyń dıspetcherlik qyzmetteri men Qurmanǵazy aýdanyna elektr energııasyn jetkizetin reseılik uıymnyń tarıfteri qymbattaǵan. Buǵan qosa, bizdegi ótkizý kólemi de tómendedi. Munyń barlyǵy tarıfke áser etip otyr, — dedi «Atyraý Jaryq» JShS dırektorynyń elektr energııasyn satý jónindegi orynbasary Turlan Doshatov.
«Atyraý Jaryq» JShS-niń tarıfti ózgertý týraly usynysy Tabıǵı monopolııalardy retteý komıtetiniń Atyraý oblysy boıynsha departamentiniń qaraýyna joldandy.
Qorytyndy sheshim qazan aıyna deıin qabyldanýy tıis.
Eske salaıyq, 1 qazannan bastap Atyraýda jylý energııasyn berý, taratý jáne ótkizý qyzmetiniń tarıfi de 1 qazannan bastap kóterilýi yqtımal.
