Atyraýda elektr qýaty tapshylyǵy: kóshe jaryǵy 3 saǵatqa kesh qosylady

ATYRAÝ. KAZINFORM – Oblys ortalyǵynda elektr energııasyn únemdeý maqsatynda túngi kóshe jaryq shamdary 21:00-de jaǵylatyn boldy. Bul ýaqyt ádettegiden úsh saǵatqa kesh.

Ákimdik taratqan resmı aqparatqa súıensek, 2026 jylǵy 20 qańtardan bastap Atyraý jáne Mańǵystaý oblystarynda elektr energııasyn óndirý kóleminiń tómendeýine baılanysty júıelik shekteýler engizilgen. Osyǵan baılanysty 23–30 qańtar aralyǵynda Atyraý qalasy TÚKSh jáne TÚI bólimi teńgerimindegi túngi kóshe jaryq shamdary saǵat 21:00-den bastap qosý týraly sheshim qabyldanǵan.

- Degenmen birqatar negizgi kóshe burynǵy ýaqyt boıynsha jaryqtandyrylady. Atap aıtqanda, Atyraý–Dossor tas joly, Ábilqaıyr han, Beıbarys, Taımanov, Azattyq dańǵyly, Sátbaev, Mahambet, Qurmanǵazy jáne Baımuhanov kóshelerinde jaryq shamdary ádettegi ýaqytta qosyla beredi. Qala turǵyndarynan túsiniktik tanytýdy suraı otyryp, jol qozǵalysy kezinde abaı bolýǵa shaqyramyz, - dep habarlady qala ákimdiginiń baspasóz qyzmeti.

Eske salaıyq, osyǵan deıin Atyraý JEO-ǵa gaz jetkizý toqtasa, óńirdiń jylý men elektr qaýipsizdigine qaýip tónetini týraly jazǵan edik.