Atyraýda elektr energııasynyń jańa tarıfi bekitildi
ATYRAÝ. KAZINFORM — Atyraýda turmystyq tutynýshylar úshin elektr energııasynyń tarıfi 1 qazannan bastap 10 paıyzǵa ósedi.
«Atyraý Jaryq» JShS taratqan aqparatqa sáıkes, QR Ulttyq ekonomıka mınıstrligi Tabıǵı monopolııalardy retteý komıtetiniń Atyraý oblysy boıynsha departamenti kompanııanyń elektr energııasyna baǵany kóterý týraly usynysyn qaraǵan.
Buǵan deıin «Atyraý Jaryq» turǵyndar úshin tarıfti 1 kVt/saǵ úshin 28,98 teńgege deıin kóterýdi usynǵan edi. Bul qoldanystaǵy baǵadan 30 paıyzǵa nemese 6,69 teńgege joǵary. Alaıda qaraý nátıjesinde turmystyq tutynýshylar úshin elektr energııasyn bólshek saýdada ótkizý qyzmetiniń baǵasy kVt/saǵatyna 24,52 teńge mólsherinde kelisilgen. Baǵa QQS-syz kórsetilgen. Osylaısha tarıf 10 paıyzǵa nemese 2,23 teńgege ósti.
Monopolıst mekemeniń málimetinshe, baǵanyń ózgerýine energııa óndirýshi jáne energııa berýshi uıymdar tarıfteriniń ósýi, ulttyq joba boıynsha shyǵystardyń engizilýi, sondaı-aq qyzmetkerlerdiń jalaqysynyń artýy sebep bolǵan.
Buǵan deıin atyraýlyqtar elektr energııasy men jylý tarıfin kóterý usynysyna qarsylyq bildirdi. Olar tarıfti ósirýge negiz bolǵan shyǵyndardyń tolyq ári ashyq kórsetilýin talap etip, qyzmet quny qymbattaǵanymen, jelilerdiń tozýy men qyzmet sapasyna qatysty máselelerdiń áli sheshilmegenin aıtqan edi.
