Atyraýda elektr energııasy men jylý tarıfi ózgerýi múmkin
ATYRAÝ. KAZINFORM – Atyraýda elektr energııasy men jylý tarıfin kóterý usynysyna turǵyndar men qoǵam belsendileri qarsylyq bildirdi. Olar tarıfti ósirýge negiz bolǵan shyǵyndardyń tolyq ári ashyq kórsetilýin talap etip, qyzmet quny qymbattaǵanymen, jelilerdiń tozýy men qyzmet sapasyna qatysty máselelerdiń áli sheshilmegenin aıtty.
Turǵyndar men qoǵam belsendileri tarıftiń ósýine qatysty usynylǵan jáne istelgen jumystyń esep-qısaby qoǵamǵa túsinikti ári qoljetimdi bolýyn surady. Olardyń aıtýynsha, jyl saıyn tarıf qymbattaǵanymen, qyzmet sapasyna qatysty máseleler tolyq sheshilmeı otyr. Atyraý oblystyq qoǵamdyq keńesiniń múshesi Saltanat Rahımova «Atyraý Jaryq» kompanııasynyń eseptiligine qatysty másele kóterdi.
- Buryn «Atyraý Jaryq» kompanııasy aktsıonerlik qoǵam boldy. Byltyr JShS-ge aınaldy. Qazir biz olardyń aýdıtorlyq esebin de kóre almaımyz. Modernızatsııa jasaýǵa, qurylǵylaryn jóndeýge bıýdjetten qarjy bólinip otyr. Oǵan qosa tutynýshy tarıf boıynsha taǵy tólep otyr. Eger qarajat jetpeı jatsa, nege quryltaıshylary men menshik ıeleri óz qarajatyn salmaıdy? Nege tarıfti kótere beredi?», – dedi Saltanat Rahımova.
Buǵan deıin monopolıst tarıfti kóterý týraly usynysty elektr energııasyn satyp alý quny, ony berý jáne dıspetcherlik qyzmetterdiń qymbattaýy, sondaı-aq syrtqy uıymdardan alynatyn qyzmetter baǵasynyń ósýimen baılanystyrǵan edi.
Bul tusta qoǵam belsendileri birneshe jyl buryn elimizde qurylǵan biryńǵaı satý operatorynyń jumysyna qadaǵalaý kerektigin aıtty. Óıtkeni, olar da elektr energııasynnyń satý baǵasyn kóterip otyr.
- Qashan qalasa, sol kezde kóteredi. Al biz onyń shyǵyndary men kiristerin kórgimiz kelgende, onyń qandaı da bir taraptan rettelmeıtini anyqtalady. Bul kompanııalardy oblys turǵyndary qamtamasyz etip otyr. Sondyqtan memleket tarapynan buǵan nazar aýdarý kerek, – dedi qoǵam belsendisi Baljan Dosmuhambetova.
Al «Atyraý Jaryq» JShS bas ınjeneri Qýat Sısenǵalıevtiń aıtýynsha, kásiporynnyń óz qarajatyna 22 qosalqy stantsııa tolyq rekonstrýktsııadan ótken.
- Atyraý Jaryqtyń rekonstrýktsııasy óz qarajaty esebinen jasalady, ákimdikten aqsha bólinip otyrǵan joq, – dedi ol.
Turǵyndardyń negizgi suraǵy – tarıftiń ósýi qyzmet sapasynyń jaqsarýyna qanshalyqty áser etedi degen másele.
- Biz de bul máseleni talqylaımyz.Másele jeliniń tozýyna, tutynýshylardyń kóbeıýine, transformatorlardyń eskirýine baılanysty. Memleket tarapynan baǵdarlamalar bar. Olar boıynsha tarıfti de birden kótermeı, azdap kóterý kózdelgen,-dedi QR Energetıka vıtse-mınıstri Erlan Akbarov.
Jylý tarıfine qatysty jaǵdaı da osyǵan uqsas. Qazan aıynan bastap Atyraýda jylý energııasyn berý, taratý jáne ótkizý qyzmetiniń tarıfin shamamen 30 paıyzǵa kóterý usynylyp otyr. https://kaz.inform.kz/news/atirauda-zhilu-tarif-ozgeru-mumkn-164ddfac/
«Atyraý jylý júıeleri» JShS bul ósimdi jylý jelilerin jańǵyrtýǵa baǵyttalǵan ınvestıtsııalyq baǵdarlamamen túsindirgen edi.
Atyraý turǵyndary úshin mańyzdy taqyryptyń biri jylý elektr ortalyǵyna gaz jetkizý qunyna baılanysty. «Atyraý jylý elektr ortalyǵy» JShS basshysy Maqsot Álenovtiń aıtýynsha, buryn TShO-dan gaz jylý elektr ortalyǵyna tikeleı jetkizilse, bıyl tasymaldaý tizbegine QazaqGaz qosylǵan.
- TShO-dan beri qaraı alyp kelý úshin eki mekemeniń baǵasyn qosqanda, buryn gazǵa 1 myń kýbqa 13 800 teńge tólesek, qazir 16 842 teńge tóleıtin boldyq. Onyń byltyrǵy baǵamen salystyrǵanda ınflıatsııalyq qosylymy bar, – dedi Maqsot Álenov.
Tarıf máselesinde gazdyń róli zor. Óıtkeni, Atyraý jylý elektr ortalyǵy gazdan elektr energııasyn óndiredi. Mundaı másele byltyr Jylyoı aýdanyn gazben qamtyp otyrǵan «Jylyoıgaz» mekemesine qatysty týyndaǵan edi. Kóptiń tilegi oryndalyp, tasymaldaý tizbegine QazaqGas qosylmady. Sondyqtan belsendiler Atyraý jylý elektr ortalyǵy gazdy burynǵydaı TShO-dan tikeleı alǵanyn qalaıdy.
- «Jylyoıgaz» turǵyndarǵa arnalǵan gazdy áli de «Teńizshevroıldan» tikeleı satyp alyp otyr. Ol – tabıǵı monopolııa sýbektisi. Sondyqtan jylý elektr ortalyǵynyń da osyndaı quqyqqa ıe bolýyna tolyq negiz bar. Óıtkeni tabıǵı monopolııalar týraly zańda gazdyń strategııalyq taýar ekeni jáne ony taýar óndirýshiden tikeleı satyp alý qajettigi kórsetilgen. Al Qazaq Gas kompanııasy gazdy kóterme jáne bólshek saýdada ótkizýmen aınalysady. Sondyqtan osy máseleni qaıta qaraýdy suraımyz. Onyń ústine bul másele buǵan deıin de Energetıka mınıstrliginiń Qoǵamdyq keńesiniń otyrysynda kóterilgen,-dep pikir bildirdi qoǵam belsendisi Baljan Dosmuhambetova.
Bıyl Atyraý jylý elektr ortalyǵyna gazdyń arnaıy baǵasy Premer-mınıstrdiń hattamasymen bekitilgen. Bul baǵa 2026-2027 jyldarǵa belgilengen. ıAǵnı aldaǵy eki jylda gaz qunynyń ózgerýi shekteýli bolady, al odan keıingi kezeńdegi baǵa ázirge belgisiz.
Aıta keteıik, Qazaq Gas ulttyq kompanııasy gaz jáne gazben jabdyqtaý salasyndaǵy ulttyq operator bolyp esepteledi.
Buǵan deıin Petropavlda bıznes úshin tarıf bıyl 1 mamyrdan bastap — 20%, turǵyndar úshin 1 qyrkúıekten 15% ósti. Al bıýdjettik uıymdar úshin tarıf shamamen eki ese artqanyn jazǵan edik.
