Atyraýda ekologııalyq zańbuzýshylyqtar úshin 2,3 trln teńge aıyppul salyndy
ATYRAÝ. KAZINFORM — 2025 jyly Atyraý oblysy boıynsha atmosferaǵa jiberilgen shyǵaryndylar kólemi 128,7 myń tonnany qurady. 2024 jyly bul kórsetkish 117,8 myń tonnadan asqan. Osylaısha, bir jyl ishinde shyǵaryndylar kólemi 10,9 myń tonnaǵa artqan.
Atyraý oblysy ekologııa departamentiniń málimetinshe, shyǵaryndylardyń kóbeıýi «Atyraý jylý elektr ortalyǵy» AQ, «Teńizshevroıl» JShS, «Embamýnaıgaz» AQ, «Maten Petroleým» AQ, «Jasyl Energy» JShS, «West Dala» JShS, «Kazakhstan Petrochemical Industries Inc» JShS, «Caspian Offshore Construction Realty» JShS, «Spetsavtobaza» JShS, «GPC Investment» JShS jáne «Karaton Operating Ltd.» JK qyzmetimen baılanysty.
Lastaýshy zattardyń naqty tógindileri de artqan. 2025 jyly bul kórsetkish 15,959 myń tonnany qurasa, 2024 jyly — 15,725 myń tonna bolǵan, ıaǵnı tógindi kólemi 0,234 myń tonnaǵa kóbeıgen. Tógindilerdiń ulǵaıýy negizinen «Teńizshevroıl» JShS, «Atyraý jylý elektr ortalyǵy» AQ, «Caspian Offshore Construction Realty» JShS, «Embimunaıgaz» AQ jáne «Maten Petroleým» AQ kásiporyndarynda baıqalǵan.
2025 jylǵa belgilengen lımıt boıynsha atmosferalyq shyǵaryndylar kólemi 289,509 myń tonna bolsa, naqty kórsetkish 128,798 myń tonnany qurady. Al tógindiler lımıti 42,878 myń tonna bolyp bekitilgenmen, byltyr bul kórsetkish 15,959 myń tonna boldy. Qaldyqtardy kómý jáne jınaqtaý kórsetkishi belgilengen lımıtten tómen ekeni anyqtaldy.
Memlekettik ekologııalyq baqylaý aıasynda 2025 jyly departament 32 tekserý júrgizgen. Onyń ishinde 13 profılaktıkalyq baqylaý, 15 jospardan tys jáne talaptarǵa sáıkestikke anyqtaý maqsatynda júrgizilgen 4 tekseris bar.
— Baqylaý nátıjesinde ekologııalyq zańnamanyń 96 buzýshylyǵy anyqtalyp, 30 nusqama berilgen. Barlyq nusqama oryndaldy. Anyqtalǵan zańbuzýshylyqtar boıynsha 158 ákimshilik is qozǵalyp, jalpy somasy 2 trln 360 mlrd teńge kóleminde aıyppul salynǵan edi. Qazir 993 mln teńge memleket paıdasyna óndirildi. Sondaı-aq sharýashylyq qyzmetti toqtata turý týraly sotqa 3 talap-aryz joldanyp, sot sheshimimen qanaǵattandyryldy, — dedi ekologııa departamentiniń basshysy Asqar Júnisov.
2025 jylǵy rezonanstyq ister boıynsha salynǵan aıyppul kólemi qomaqty. Atap aıtqanda:
— «Embimunaıgaz» AQ — 10,9 mln teńge;
— «Karabatan Utility Solutions» JShS — 27,6 mln teńge;
— «ANACO» JShS — 897 mln teńge;
— «QoJan» AQ — 1,3 mln teńge;
— NCOC kompanııasy — 2,3 trln teńge;
— «Atyraý munaı óńdeý zaýyty» JShS — 34,1 mln teńge;
— «Potentsıal Oıl» JShS — 9,2 mln teńge;
— «Teńizshevroıl» JShS — 636,6 mln teńge.
Atyraýda aýanyń kúkirtsýtegimen joǵary lastanýyna «Atyraý munaı óńdeý zaýyty» JShS-niń, «KazTransOıl» AQ-y, Atyraý qalasynyń oń jaq bóliginde ornalasqan «Kvadrat», sol jaq bóliginde ornalasqan «Týhlaıa balka» býlaný alańdary, «Atyraý oblysy sý arnasy» KMK qarasty qala ishindegi kárizdik sorǵy stantsııalary áser etip otyr. 2025 jyldyń 12 aıynda Kazgıdromettiń Atyraý qalasy men Maqat aýdanynda ornalasqan avtomattandyrylǵan stantsııalarynyń derekterine sáıkes, 2025 jyly atmosferalyq aýanyń kúkirtsýtegimen joǵary lastanýynyń 136 (2024 jyly — 233) jaǵdaıy, ekstremaldy joǵary lastanýdyń 1 (2024 jyly — 5) jaǵdaıy tirkelgen.
Osyǵan deıin óńir ekologteri Atyraý munaı óńdeý zaýytynda byltyr jeltoqsan aıynda jáne bıyl qańtarda birneshe tehnologııalyq qondyrǵy isten shyǵyp, nátıjesinde fakel arqyly atmosferalyq aýaǵa 40 myń tekshe metr otyn gazy ekologııalyq ruqsatsyz shyǵarylǵanyn málimdegen edi.