Atyraýda ekologııalyq tekseristi paramen sheshpek bolǵan basshy 270 mln teńge aıyppul arqalady

Oqıǵa 2026 jyldyń qańtarynda bastalǵan. 2025 jylǵy 31 jeltoqsanda Atyraý oblysy boıynsha Ekologııa departamenti kásiporynǵa 2026 jylǵy josparǵa sáıkes ekologııalyq tekserý júrgiziletini týraly habarlama jibergen.

Alǵashqy kezdesýde 10–15 mln para berýdi suraǵan

2026 jylǵy 14 qańtarda «Potentsıal Oıl» JShS bas dırektorynyń orynbasary Nurjan Jantýrın josparlanǵan tekserý týraly aqparat alý úshin Ekologııa departamenti basshysynyń orynbasary Erlan Esenovpen kezdesýge usynys jasaǵan.

Olar Atyraýdaǵy qymbat meıramhanalardyń birinde kezdesken. Júzdesýge Jantýrınmen birge kompanııanyń bas dırektory Gabıden Karamoldın de barǵan. Sot úkiminde kórsetilgendeı, áńgime barysynda Esenov kompanııa esepterinde ekologııalyq kodeks talaptarynyń buzylǵanyn jáne kásiporynǵa shamamen 650 mln teńge aıyppul salynýy múmkin ekenin aıtqan.

Osydan keıin Jantýrın tekserý aktisinde anyqtalǵan buzýshylyqtardy kórsetpeýdi suraǵan. Sot úkimindegi sıpattaý bóligindegi aqparatqa súıensek, osy kezde ekologııa departamenti basshysynyń orynbasarynda qyzmettik ókilettigine kiretin máseleni oń sheshkeni úshin 10–15 mln teńge kóleminde para alý nıeti týyndap, ol bul somany Jantýrınnen talap etken. Alaıda Jantýrın naqty jaýap bermegen.

Keıin Jantýrın bul áńgimeni Karamoldınge jetkizgen. Shamamen 15 qańtarda kompanııa ekology qujattardy qaıta tekserip, Ekologııa departamenti kórsetken buzýshylyqtardyń negizdi ekenin rastaǵan.

Esenov para alýdan bas tartqan

Osydan keıin Karamoldın kásiporynǵa úlken kólemde aıyppul salynýy múmkin ekenin eskerip, Ekologııa departamentiniń laýazymdy tulǵalaryna para berý týraly oıǵa kelgen. Al Jantýrın bul máseleni Esenovpen ózi kelissóz júrgizip sheshýge tyrysatynyn aıtqan.

16 qańtar shamasynda Esenov Jantýrındi Ekologııa departamentine shaqyryp, tekserý kezinde basqa da kemshilikter anyqtalýy múmkin ekenin aıtqan. Tekserýdiń naýryz aıyna shegeriletinin jetkizgen.

— N.Jantýrın atalǵan buzýshylyqtar boıynsha máseleni sheshý maqsatynda E.Esenovten osy jaǵdaıdan shyǵý jolyn tabýǵa jáne kómek kórsetýge ótinish bildirgen. Óz kezeginde, E.Esenov óziniń para alý túrindegi qylmystyq oıynan qaıtpastan, talap etken aqsha qarajatyn suraǵan. Bul rette JShS-niń paıdasyna árekettengen N.Jantýrın óz kelisimin berip, ári qaraı E.Esenov oǵan ekologııalyq tekseristiń bastalýyn kútýdi surap, sol tekseris kezinde habarlasyp másele qaralatyndyǵyn jetkizgen. Alaıda, osy áńgimelesýden keıin E.Esenov tergeýmen anyqtalmaǵan belgisiz sebepterdiń saldarynan, tikeleı qasaqanalyqpen týyndaǵan, para alý túrindegi qylmystyq quqyqbuzýshylyq oıyn aqyryna deıin jetkizýden óz erkimen, birjolata bas tartyp, JShS-niń dırektorynyń orynbasary N.Jantýrınniń «WhatsApp» jelisi arqyly qońyraýlaryna jáne jazǵan habarlamalaryna jaýap qaıtarýdy toqtatqan, — delingen úkimniń sıpattaý bóliginde.

Kompanııa basshysy basqa jol izdegen

Aqpan aıynda Esenov pen Jantýrın arasyndaǵy baılanys úzilgennen keıin Karamoldın máseleni sheshýdiń basqa joldaryn izdeı bastaǵan. Ol ózine baǵynyshty ınjener Janar Isabaevadan Ekologııa departamentindegi tekserý nátıjesine yqpal ete alatyn tanystary bar-joǵyn anyqtaýdy suraǵan.

Isabaeva Karamoldınniń para berý týraly oıyn túsinip, oǵan kómektesýge kelisken. Ol buryn Atyraý oblysy ákimdiginde qyzmet atqarǵan Rýstem Abılovke habarlasyp, kompanııaǵa qatysty ekologııalyq tekserý máselesin para arqyly sheshýge bolatynyn aıtqan.

Abılov bul máseleni Aıbek Rahmetovpen talqylaǵan. Rahmetovtiń buryn Atyraý oblysy prokýratýrasynda qyzmet atqarǵany sot úkiminde kórsetilgen. Abılov oǵan kompanııa ókilderi máseleni oń sheshý úshin 10–15 mln teńge berýge daıyn ekenin aıtqan.

Alaıda sot anyqtaǵandaı, Rahmetovtiń Ekologııa departamentinde máseleni sheshýge yqpal ete alatyn tanystary bolmaǵan. Ol Abılovpen birge Isabaevany aldap, aqshany ıemdený týraly qylmystyq jospar qurǵan.

Keıin olar Isabaevaǵa ekologııalyq tekserý máselesin sheshetin laýazymdy tulǵalar tabylǵanyn aıtyp, 15 mln teńge qajet ekenin jetkizgen. Sonymen qatar Abılov Isabaevaǵa osy aqshany alýǵa kómekteskeni úshin 1 mln teńge beriletinin aıtqan.

15 mln teńge berýge kelisim jasalǵan

Naýryzdyń 15–16-sy shamasynda Isabaeva Karamoldınge ekologııalyq tekserý nátıjesine yqpal etý úshin tanystary arqyly Ekologııa departamentiniń laýazymdy tulǵalaryna 15 mln teńge berý qajet ekenin aıtqan. Kásiporynǵa shamamen 650 mln teńge aıyppul salynýy múmkin ekenin eskergen Karamoldın aqsha berýge kelisken.

Para berilgen

27 naýryzda Isabaeva Karamoldınge ekologııalyq tekserý máselesin sheshý úshin shuǵyl túrde 5 mln teńge qajet ekenin jetkizgen. Karamoldın óz jınaǵyndaǵy 2,85 mln teńgeni jáne nesıege alǵan 2,18 mln teńgeniń bir bóligin paıdalanyp, qajetti somany jınaǵan. Keıin ol Isabaevaǵa 5 mln teńgeni bergen.

Sol kúni Isabaeva bul aqshany «Infinity» oıyn-saýyq kesheninde Rýstem Abılovke tapsyrǵan. Abılov keıin Aıbek Rahmetovke 3 mln teńge bergen, al qalǵan 2 mln teńgeni ózi ıemdengen.

30 naýryzda Ekologııa departamenti kompanııaǵa qatysty tekserýdi bastaǵan. Karamoldın buǵan alańdap, Isabaevadan jaǵdaıdy suraǵan. Ol másele sheshiletinin jáne laýazymdy tulǵalar qalǵan aqshany kútip otyrǵanyn aıtqan.

9 sáýirde Karamoldın taǵy 5 mln teńge bergen. Isabaeva bul aqshany «Zerde» dárihanasynan Rýstem Abılovke tapsyrǵan. Abılov aqshany alǵannan keıin Aıbek Rahmetovke bergen.

13 sáýirde sońǵy 5 mln teńge daıyndalǵan. Karamoldın aqshany qyzmettik kóligine qaldyryp, Isabaevaǵa alyp ketýdi tapsyrǵan. Isabaeva aqshany alyp, keıin Abılovke tapsyrǵan. Dál osy parany alý kezinde Abılov QR UQK Atyraý oblysy boıynsha departamentiniń qyzmetkerlerine ustalǵan.

Tergeý barysynda Abılov aqshany ári qaraı Rahmetovke beretinin aıtqan. Osydan keıin 4 mln teńgeni Rahmetovke berý operatsııasy ýákiletti organ qyzmetkerleriniń baqylaýymen júrgizilgen. Aqshany alǵan kezde Rahmetov te ustalǵan.

Sot qandaı jaza taǵaıyndady?

Sot Karamoldındi Ekologııa departamentiniń laýazymdy tulǵalaryna iri mólsherde, jalpy 15 mln teńge para berýge oqtalǵany úshin kináli dep tanydy. Isabaeva para berýge oqtalǵan Karamoldınge kómekteskeni úshin kináli dep tanyldy. Al Abılov pen Rahmetov adamdar toby bolyp, 14 mln teńge kóleminde alaıaqtyq jasaýǵa oqtalǵany úshin kináli dep tanyldy.

Karamoldınge paranyń 18 eselengen somasy mólsherinde 270 mln teńge aıyppul salynyp, memlekettik qyzmette, sýdıa qyzmetinde, jergilikti ózin-ózi basqarý organdarynda, Ulttyq bankte, memlekettik uıymdarda jáne kvazımemlekettik sektor sýbektilerinde laýazym atqarý quqyǵynan ómir boıyna aıyryldy.

Isabaevaǵa da 270 mln teńge aıyppul taǵaıyndalyp, birqatar memlekettik jáne kvazımemlekettik uıymda laýazym atqarý quqyǵynan ómir boıyna aıyryldy.

Al Abılov pen Rahmetovtiń árqaısysyna 2 jyl 6 aıǵa bas bostandyǵyn shekteý jazasy taǵaıyndaldy. Sonymen qatar olardan qylmystyq quqyq buzýshylyq nátıjesinde alynǵan 10 mln teńge memleket kirisine óndirildi.

Aıta keteıik, Atyraý oblysy boıynsha ekologııa departamenti basshysynyń orynbasary Erlan Esenovtiń tártiptik isi memlekettik qyzmet ister agenttiginiń Atyraýdaǵy departamentinde qaralyp, atqaratyn laýazymynan bosatý túrindegi tártiptik jaza taǵaıyndaldy. ıAǵnı, basshy orynbasary qyzmetinen bosatyldy.

Eske salaıyq, osy jyldyń alǵashy alty aıynda Atyraý oblysynda ekologııalyq zańnamany buzýǵa baılanysty 218 ákimshilik is qozǵalyp, 2,4 mlrd teńgeden astam aıyppul salyndy. Olardyń arasynda atalǵan «Potentsıal-Oıl» JShS-i de bar.