Atyraýda ekologııa talaptaryn buzǵandarǵa 2,4 mlrd teńge aıyppul salyndy
ATYRAÝ.KAZINFORM — Osy jyldyń alǵashy alty aıynda Atyraý oblysynda ekologııalyq zańnamany buzýǵa baılanysty 218 ákimshilik is qozǵalyp, 2,4 mlrd teńgeden astam aıyppul salyndy.
Atyraý oblysy boıynsha ekologııa departamentiniń málimetinshe, osy kezeńde ekologııalyq zańnamanyń saqtalýyna qatysty 17 baqylaý júrgizildi. Onyń ishinde 5 profılaktıkalyq baqylaý, 7 jospardan tys tekseris jáne 5 talapqa sáıkestigine tekseris bar.
Baqylaý barysynda ekologııalyq zańnama talaptarynyń 68 buzýshylyǵy anyqtalyp, olardy joıý týraly 17 nusqama berildi. Anyqtalǵan zań buzýshylyqtarǵa baılanysty 218 ákimshilik is qozǵalyp, jalpy somasy 2 mlrd 418,8 mln teńge kóleminde aıyppul salyndy. Onyń 89,7 mln teńgesi memleket paıdasyna óndirildi. Qalǵan aıyppuldar sot protsesterine baılanysty óndirip alý satysynda.
Іri kólemde aıyppul arqalaǵan kompanııalar tizimi:
• «Potentsıal-Oıl» JShS — 1 mlrd 448 mln teńge;
• «Atyraý munaı óńdeý zaýyty» JShS — 520,5 mln teńge;
• «Magıstraldy Sý qubyry» JShS — 334,1 mln teńge;
• «Teńizshevroıl» JShS — 53,7 mln teńge;
• «Svetland Oıl» JShS — 27,6 mln teńge.
Ekologııa departamenti sharýashylyq qyzmetti toqtata turý týraly sotqa úsh materıal joldaǵan. Onyń ekeýi «InderTuzCompany» JShS-ne, bireýi «Svetland Oıl» JShS-ne qatysty. Sot sheshimimen «InderTuzCompany» JShS boıynsha bir materıal qanaǵattandyrylyp, qalǵandary qaralyp jatyr.
— Óńirde І sanatqa jatatyn 82 kásiporyn jumys isteıdi. Jarty jylda atmosferaǵa lastaýshy zattardyń naqty shyǵaryndysy 58,8 myń tonnany, tógindiler kólemi 8,8 myń tonnany, kómilgen qaldyqtar kólemi 70,8 myń tonnany, jınalǵan qaldyqtar kólemi 107,6 myń tonnany qurady, — dep málimdedi ekologııa departamenti.
«Qazgıdromet» mekemesiniń avtomattandyrylǵan stantsııalarynyń deregine sáıkes, 2026 jyldyń alǵashqy alty aıynda Atyraý qalasynda atmosferalyq aýanyń kúkirtsýtegimen joǵary lastanýynyń 25 jaǵdaıy tirkelgen. Bul ótken jyldyń sáıkes kezeńimen salystyrǵanda 3,5 ese az (2025 jyly — 89 jaǵdaı). Osy kezeńde ekologııa departamenti atmosferalyq aýaǵa 59 synama alyp, olardyń negizinde 239 zerthanalyq taldaý júrgizgen.
Osyǵan deıin Atyraýda topyraqty lastaǵan kompanııaǵa 4,3 mln teńge aıyppul salynǵanyn jazǵan edik.
