Atyraýda ekinshi ret lotos festıvali ótedi
ATYRAÝ. KAZINFORM – Atyraý oblysynyń Qurmanǵazy aýdanynda LOTOS FEST festıvali 15-16 tamyzda ótedi. Іs-sharany uıymdastyrýǵa aýdandyq bıýdjetten 191,9 mln teńge bólingen. Onyń basym bóligi týrıstik ınfraqurylymdy damytýǵa baǵyttalǵan.
Qurmanǵazy aýdandyq ákimdiginiń málimetinshe, lotos gúldeıtin alqap qyrkúıek aıynyń sońyna deıin kelýshiler úshin ashyq bolady. Festıvaldi uıymdastyrýǵa bólingen 191,9 mln teńgeniń 131,9 mln teńgesi ınfraqurylymdyq jobalarǵa, 60 mln teńgesi mádenı baǵdarlamaǵa qarastyrylǵan.
Infraqurylym aıasynda uzyndyǵy 414 metr, eni 2 metr bolatyn ponton ótkeli salynyp, onyń boıyna kólemi 6h4 metr bolatyn toǵyz sholý alańy ornatylady. Sondaı-aq qaıyq aılaǵy keńeıtilip, aýmaq tolyq jaryqtandyrylady. Budan bólek generator, polıtsııa, tótenshe jaǵdaılar qyzmeti men medıtsına mamandaryna arnalǵan modýldik nysandar jáne sanıtarlyq modýlder qoıylady.
Aýdan ákimdigi bul nysandardyń festıvalden keıin de aýyldyq okrýgtiń teńgeriminde qalyp, kelesi jyldary da paıdalanylatynyn atap ótti.
- Bólingen qarjynyń negizgi bóligi bir rettik sharaǵa emes, uzaq merzimge qyzmet etetin ınfraqurylymdy damytýǵa jumsalyp otyr. Salynatyn nysandar aýyldyq okrýgtiń teńgerimine beriledi jáne aldaǵy ýaqytta da týrısterge qyzmet kórsetýde paıdalanylady. Bul aýdannyń týrıstik áleýetin damytýǵa baǵyttalǵan ınvestıtsııa,– dep málimdedi aýdan ákimdigi.
Ákimdik málimetinshe, byltyr lotos alqabyn 40 myńnan astam adam tamashalaǵan. Bıyl kelýshiler sanynyń artýy kútilip otyr.
Festıval aıasynda 15-16 tamyz kúnderi kontsert uıymdastyrylyp, elimizge tanymal ánshiler óner kórsetedi. 50 saýda pavılony men 30 qoǵamdyq tamaqtaný orny jumys isteıdi.
Qazaqstannyń Qyzyl kitabyna engen lotos Qurmanǵazy aýdanyndaǵy Qıǵash ózeniniń salasynda shilde aıynyń ortasynan bastap gúldeıdi.
Jýyqta gúldiń bul túri Atyraý qalasyndaǵy Peretaska ózeginde shyǵa bastaǵanyn jazǵan edik.
