Atyraýda eki jyldan beri onkodıspanser salý máselesi sheshilmeı keledi
ATYRAÝ. KAZINFORM — Birneshe jyldan beri Atyraýda onkologııalyq dıspenserge jańa ǵımarat salý máselesi sheshilmeı keledi. Ákimdiktiń jospary boıynsha nysan 2024 jyldyń aıaǵynda bastalýy tıis edi. Alaıda bul jumys sozbalańǵa salynyp ketti.
Jýyqta oblystyq onkologııalyq dıspanserdiń jańa ǵımaratyn salý úshin 35,9 mıllıard teńge qarastyrylyp, memlekettik satyp alý portalyna konkýrs jarııalandy. Medıtsınalyq nysan 180 oryndyq bolýy tıis.
Tapsyrys berýshi — Atyraý oblysy qurylys, sáýlet jáne qala qurylysy basqarmasy. Qujatqa sáıkes, qurylys «tolyq aıaqtalǵan» keshendik jumystar formatynda júzege asyrylady, ıaǵnı, merdiger nysandy buzyp, ornyna jańa ǵımarattyń jobasyn jasap, qurylysyn júrgizýi shart. Jobalaý kezeńi barlyq bastapqy derek tapsyrylǵan kúnnen bastap tórt aı ishinde aıaqtalýy tıis. Jobanyń jobalaý kezeńi barlyq qajetti bastapqy qujattar tapsyrylǵan kúnnen bastap 4 aıǵa sozylady. Bul merzimge jobany saraptamaǵa ótkizý ýaqyty kirmeıdi. Al qurylys jumystarynyń naqty uzaqtyǵy vedomstvodan tys saraptamanyń oń qorytyndysy shyqqannan keıin naqtylanady.
— Jańa onkologııalyq dıspanserde zamanaýı ınjenerlik júıeler qarastyrylady. Atap aıtqanda, nysan sýmen, káriz júıesimen, gaz jáne elektr jelilerimen, telefonızatsııa júıesimen qamtylady. Sonymen qatar, energııa únemdeý tehnologııalary men jańartylatyn energııa kózderin paıdalaný kózdelgen, — delingen tehnıkalyq talapta.
Joba múmkindigi shekteýli azamattardyń qoljetimdiligine de beıimdeledi. Ǵımaratta pandýstar, arnaıy kirme joldar jáne múgedekter arbasyna arnalǵan qurylǵylar ornatylmaq. Budan bólek, beınebaqylaý júıesi engizilip, qaýipsizdik talaptaryna erekshe kóńil bólinedi.
Tehnıkalyq talapqa sáıkes, qurylys barysynda joǵary sapaly qurylys materıaldary men jabdyqtar qoldanylyp, otandyq taýar óndirýshilerdiń ónimderine basymdyq berilýi kerek.
Jalpy Atyraýda qaterli isikke shaldyqqan 6000-ǵa jýyq adam esepke alynǵan. 2025 jyldyń qorytyndysy boıynsha onkologııalyq aýrýlardyń ishinde birinshi orynda — asqazan qaterli isigi, ekinshi orynda — sút bezi qaterli isigi, al úshinshi orynda — toq ishek qaterli isigi tur. Mamandardyń aıtýynsha, respýblıka boıynsha Atyraý oblysy onkologııalyq aýrýshańdyq kórsetkishi jaǵynan 14-orynda.
Resmı aqparatqa súıensek, bıyl alǵashqy úsh aıdyń qorytyndysy boıynsha Atyraý oblysynda onkologııalyq aýrýshańdyq kórsetkishi 100 myń turǵynǵa shaqqanda 136,8-ge teń (245 jaǵdaı). Bul 2025 jylmen salystyrǵanda 13,7%-ǵa joǵary.
Qazirgi ýaqytta qoldanystaǵy dıspanserdiń aýmaǵynda radıologııalyq korpýstyń qurylysy júrip jatyr. Densaýlyq saqtaý basqarmasy ókilderiniń sózinshe, dıspanserdiń ýaqytsha basqa ǵımaratqa qashan kóshetini ázirge belgisiz.
Buǵan deıin Atyraý ákimdigi nelikten 16 mln teńgege ǵımarat jaldap otyrǵany jóninde jazǵan edik.
