Atyraýda eki jylda 1 myńnan astam jumysshynyń jalaqy qaryzy óndirilgen

ATYRAÝ. KAZINFORM — Atyraýda sońǵy eki jylda 1 myńnan astam jumysshynyń quqyǵy qorǵalǵan. Olarǵa 586 mln teńge jalaqy bereshegi óndirip berilgen.

Atyraý oblysy prokýratýrasynyń alqa otyrysynda eńbek zańnamasynyń saqtalýy, eńbek qatynastary salasynda týyndaǵan daýlardy boldyrmaý máselesi talqylandy.

Jıynǵa Atyraý oblysynyń ákimi Serik Shápkenov, qala jáne aýdan prokýrorlary, óńirdegi iri munaı kompanııalarynyń birinshi basshylary qatysty.

Oblys prokýrory Baýyrjan Jumaqanovtyń deregine súıensek, prokýratýranyń qadaǵalaý jumystary nátıjesinde 20-ǵa jýyq kásiporyn ákimshilik jaýapqa tartylǵan.

Kásiporyndarda jumys isteıtin 1 myńnan astam jumysshynyń quqyqy qorǵalyp, 586 mln teńge jalaqysyn óndirip qamtamasyz etildi.

«Memleket basshysy Qasym-Jomart Toqaevtyń Joldaýynda azamattardyń eńbek quqyqtarynyń qorǵalýyn qatań qadaǵalaý tapsyryldy.Osyǵan oraı Bas prokýrordyń tapsyrmasymen birqatar is-shara atqaryldy. Máselen «Gold Construction», «Vest Dala», «KMG-Sekıýrıtı» jáne basqa da mekemelerde eńbek qaýipsizdiginiń buzylýy, jalaqynyń ýaqytyly tólenbeýi, eńbekaqyny arttyrý, turǵyndardy jumyspen qamtý salasynda oryn alǵan quqyq buzýshylyqtar joıyldy. Biliktiligi men laýazymy sáıkes kelmeıtin 200-den astam shetel jumysshysynyń ruqsaty keri qaıtaryldy. Zańsyz eńbek etken 18 shetel azamaty Qazaqstan Respýblıkasy aýmaǵynan deportatsııalaý arqyly shyǵaryldy»,- dedi oblys prokýrory Baýyrjan Jumaqanov.

Atyraý oblysynyń ákimi Serik Shápkenovtiń aıtýynsha, azamattardyń eńbek quqyqtaryn qorǵaý basty nazarǵa alynyp otyr.

«Memlekettiń basty ustanymy — adamnyń quqyǵyn qorǵaý, zań ústemdigin saqtaý. Ár adam quqyǵy men qyzmetine saı jalaqy alýy kerek. Osy oraıda jumysshylarǵa qolaıly jaǵdaı jasaǵanymyz jón. Sondyqtan prokýratýraǵa arnaıy kelip, osy máseleni qozǵap otyrmyn. Biz birlese jumys júrgizýimiz qajet» -dedi Serik Shápkenov.

Eske sala ketelik, budan buryn Atyraýda keı kompanııalar jumysshylarǵa jalaqysyn bermeı kelgenin habarlaǵan bolatynbyz.