Atyraýda eki jyl buryn jer alǵan jurt jaryq pen aýyz sýsyz otyr
ATYRAÝ. KAZINFORM — Atyraýda eki jyl buryn qala irgesinen jer alǵan turǵyndar áli kúnge ınjenerlik ınfraqurylymnyń tolyq qosylýyn kútip otyr. Qaınar yqshamaýdanyndaǵy 400 otbasynyń bir bóligi úılerine qonystanǵanymen, jaryqty generatordan alyp, aýyz sýdy satyp paıdalanýǵa májbúr. Al keı turǵyndar kommýnıkatsııa bolmaǵandyqtan, úı qurylysyn aıaqtaı almaı otyr.
Keńózek aýyldyq okrýgine qarasty Qaınar yqshamaýdanynda bas-aıaǵy 400 otbasy jer alǵan. Turǵyndardyń aıtýynsha, jer telimderi kezekpen berilgen kezde olarǵa ınjenerlik ınfraqurylym tartylatyny aıtylǵan. Qurǵaq ýádege sengen turǵyndar jınaǵan qarjysyna úı turǵyzýǵa kirisken.
Alaıda jańa qonysqa kóshken jurt jaryq, aýyz sý jáne gaz máselesimen betpe-bet kelip otyr.
— 2025 jyly úıdiń qurylysyn aıaqtap kóship aldyq. Qazir kúnimiz generatorǵa qarap qaldy. 19 lıtrlik sýdy tasyp, paıdalanýǵa májbúrmiz. Jaryq máselesi sheshilmeı jatyr. Úıdi basynan-aıaq generatormen saldyq. Aldymyzda qys kele jatyr. Bala-shaǵamdy alyp, páter jaldaı almaımyn. Úsh jylda salyp bitirý úshin kezekpen aldyq. «Ana aı, myna aıda qosamyz» dep keledi, biraq máselemiz áli kúnge sheshilgen joq, — dedi Qaınar yqshamaýdanynyń turǵyny Abzal Dosbolov.
Biri ınjenerlik jeliler bolmasa da úılerin salyp, kóship alsa, ekinshileri qurylys jumysyn aıaqtaı almaı otyr. Óıtkeni, sheneýnikterdiń «áne, minesi» uzaqqa sozylyp ketken.
— Bárimiz úıdi salyp qoıdyq. Endi tereze-esik salaıyq desek, qaýip basym. Urlyq bolýy yqtımal. Jerdi ákimdik bergen kezde barlyq kommýnıkatsııalyq jeli júrgizilgenin aıtty, — dedi turǵyn Anarbek Qalıev.
Al qalalyq qurylys bóliminiń ókili jumystyń kesheýildeýin qujattardyń rásimdelýimen túsindirdi.
— Qaınar yqshamaýdany boıynsha qazir ınjenerlik-ınfraqurylymdyq qujattary jasaqtalyp jatyr. Turaqty jer qujattary men tehnıkalyq pasporttar bolady. Jelilerdiń tolyq qujaty jasaqtalǵan soń kommýnaldyq mekemelerge tapsyrylady. Ony bir aı kóleminde jaýapty kompanııalarǵa beremiz. Jalpy bul jumys jer qujattaryna baılanysty turyp qaldy, — dedi Atyraý qalalyq qurylys bólimi óndiristik tehnıka sektorynyń bas mamany Rınat Álimov.
Ákimdik ókilderi ınjenerlik jelilerdi tartý jumysy tolyq aıaqtalǵanyn aıtyp, qosý jumysy qysqa deıin isteletinin aıtty.
Aıta keteıik, bul yqshamaýdanǵa tasjol salynbaǵan, kóshe jaryǵy júrgizilmegen.
Jalpy Atyraý qalasynda 144 myńnan asa adam jer kezeginde tur.
Buǵan deıin Atyraý qalasynyń ákimi Shákir Keıkın óz erkimen qyzmetinen ketkenin jazǵan edik.
