Atyraýda eki jasóspirim Jaıyq ózenine batyp ketti

ATYRAÝ. KAZINFORM – Atyraýda eki jasóspirim Jaıyq ózenine batyp ketti. Biriniń múrdesi tabylyp, ekinshisin izdestirý jalǵasyp jatyr.

Atyraý oblysy ákiminiń baspasóz qyzmetinen málim etkendeı, oqıǵa búgin, 20 shildede munaıly shahar mańyndaǵy Kókarna shaǵyn aýdany tusynda tusynda bolǵan. 

«Jaıyq ózeniniń jabdyqtalmaǵan tusynda 2010 jáne 2011 jyly týǵan eki jasóspirim sýǵa túsken. Ókinishke oraı eki jasóspirim ózenge batyp ketti. Oblystyq tótenshe jaǵdaılar departamentiniń qutqarýshylary saǵat 19:30-da 2010 jylǵy jasóspirimniń múrdesin 4,5 metr tereńdikten shyǵardy. Al, 13 jasar jasóspirimdi izdestirý jumysy jalǵasyp jatyr», - dep habarlady ákimdiktiń baspasóz qyzmeti.

Sýǵa batqan jasóspirimdi izdeýge tótenshe jaǵdaılar departamentinen 15 qutqarýshy, 5 júzý quraly tartylǵan. 

«Oblys turǵyndary men qonaqtaryna qaıǵyly jaǵdaıǵa urynbaý úshin sý aıdyndarynda shomylý maýsymy áli resmı túrde ashylmaǵanyn habarlaımyz. Sol sebepten, qaýipsizdikti saqtaý maqsatynda sýǵa túspegen jón. Ruqsat etilmegen jerde shomylý qaýipti, sońy qaıǵyly jaǵdaıǵa ákelýi múmkin ekenin eskertemiz», - dep málim etti ákimdiktiń baspasóz qyzmetinen.

Eske sala ketelik, buǵan deıin Atyraýda 10 jasar bala «Munaıshy» stadıonynda basseınge batyp ketkenin jazǵan edik.