Atyraýda eki oqýshy ortalyq alańdaǵy shahmat fıgýralaryn qıratqan

Atyraýlyq eki oqýshy Isataı-Mahambet ortalyq alańyndaǵy shahmat fıgýralaryn qıratqan. Balalarynyń teris áreketi úshin ata-analary aıyppul tóledi, dep habarlaıdy Kazinform. 

Áleýmettik jelide Atyraý qalasyndaǵy Isataı-Mahambet ortalyq alańyna ornatylǵan shahmat fıgýralarynyń qulap jatqany týraly vıdeo tarady. Bul turǵyndardyń renishin týdyryp, túrli pikirge tamyzyq boldy.

Osyǵan baılanysty ýchaskelik polıtsııa ınspektorlary quqyq buzýshylardy izdeýge kiristi. Ýchaskelik polıtsııa ınspektory Ráshıd Seıtekovtiń aıtýynsha, shahmat fıgýralaryn qıratqan eki jasóspirim ustalǵan.

«Atyraý qalalyq polıtsııa basqarmasy №12 ýchaskelik polıtsııa beketiniń ınspektorlary shahmat fıgýralaryn qıratqan eki jasóspirimdi anyqtady. Olardyń ata-analaryna QR Ákimshilik quqyq buzýshylyq týraly kodeksiniń 127-babynyń 1-bólimimen (Ata-ananyń nemese basqa da zańdy ókilderdiń kámeletke tolmaǵan balalardy tárbıeleý jáne (nemese) olarǵa bilim berý, olardyń quqyqtaryn jáne (nemese) múddelerin qorǵaý jónindegi, sondaı-aq olarǵa kútim jasaý jáne kútip-baǵý jónindegi mindetterdi oryndamaýy) ákimshilik hattama toltyrylyp, aıyppul salyndy. Jasóspirimder men ata-analaryna túsindirý jumysy júrgizildi», - deıdi Ráshıd Seıtekov.

Eske sala ketelik, buǵan deıin Atyraý oblysy ákiminiń orynbasary kóbinde aýqatty, tolyq otbasynan shyqqan balalar ózine qol jumsaýǵa beıim ekenin aıtqanyn jazǵan bolatynbyz.

Sondaı-aq Atyraýda aýyl balalary mektepte emes, úsh mekemeniń bólmesinde oqyp júrgenin habarlaǵan edik.