Atyraýda Dúnıejúzilik tazalyq kúnine 7 myńnan astam adam senbilikke shyqty
ATYRAÝ. KAZINFORM – 19 qyrkúıek – Dúnıejúzilik tazalyq kúnine oraı Atyraýda «Taza orta – jarqyn bolashaq» atty aýqymdy senbilik ótip, oǵan 7 myńnan astam qala turǵyny men myńnan astam mekeme qatysty.
«Taza Qazaqstan» ekologııalyq aktsııasy aıasynda uıymdastyrylǵan shara kezinde Jaıyq ózeniniń jaǵalaýy men birqatar eldi mekenniń aýmaǵy tazartyldy. Senbilikke qatysqan oblys ákimi Bolat Aqsholaqov tal egip, turǵyndardy qorshaǵan ortaǵa uqypty qaraýǵa shaqyrdy.
– «Taza Qazaqstan» – jaı ǵana naýqan emes. Bul – qoǵamda tazalyq mádenıetin qalyptastyryp, tabıǵatqa jaýapkershilikpen qaraýdy kúndelikti daǵdyǵa aınaldyrýǵa baǵyttalǵan jalpyulttyq bastama. Bizdiń maqsatymyz – aınalany tazartý ǵana emes, qorshaǵan ortany qorǵaý, tabıǵı resýrstarǵa uqypty qaraý jáne qoǵamda ekologııalyq mádenıetti qalyptastyrý, – dedi oblys ákimi.
Tazalyq jumystary Atyraý qalasynyń Kóktem, Qaıyrshaqty, Erkinqala jáne Jumysker eldi mekenderindegi Jaıyq ózeniniń jaǵalaýlarynda júrgizildi. Sonymen qatar oblystyń barlyq aýdanynda senbilikter uıymdastyryldy.
Ekologııalyq aktsııa aıasynda óńirdi kógaldandyrýǵa da kóńil bólindi. «Samal» shaǵynaýdanyndaǵy D.Nysanǵalıuly kóshesinde 300 atyraýlyq aǵash otyrǵyzýǵa atsalysty.
Budan bólek, alty aýyldyq okrýgte 600-ge jýyq aǵash egildi.
