Atyraýda drondar qarsy baǵytqa shyqqan 450 júrgizýshini anyqtady
ATYRAÝ. KAZINFORM — Atyraý oblysynda jyl basynan beri drondardyń kómegimen qarsy baǵyttaǵy qozǵalys jolaǵyna shyǵýdyń 450 deregi anyqtaldy. Bul týraly oblystyq polıtsııa departamenti málimdedi.
Mundaı zań buzýshylyqtar Aqtóbe — Atyraý — Astrahan respýblıkalyq mańyzy bar tasjolynda tirkelgen. QR Ákimshilik quqyq buzýshylyq týraly kodeksiniń 596-baby 3-bóligine sáıkes 450 ákimshilik hattama toltyrylǵan.
— Atyraý oblysynda jol qozǵalysyn baqylaý úshin drondar qoldanylýda. Baqylaý barysynda Mercedes-Benz markaly avtokóliktiń júrgizýshisi tutas syzyqty kesip ótip, qarsy baǵyttaǵy jolaqqa shyqqany anyqtaldy. Quqyq buzýshylyq dron kamerasyna túsip, júrgizýshige qatysty tıisti ákimshilik shara qabyldandy, — delingen polıtsııa departamentiniń habarlamasynda.
Búginde óńirde tasjoldardaǵy jol qozǵalysyn baqylaıtyn úsh dron jumys isteıdi.
Buǵan deıin Shyǵys Qazaqstan oblysynda qoqys tastaǵandar dron arqyly anyqtalyp, jaýapqa tartylyp jatqany jóninde jazǵan edik.
