Atyraýda dombyra pishindes kontsert zalynyń qurylysy bastalady
ATYRAÝ. KAZINFORM – Bıyl Atyraý qalasynda 2 myń oryndyq kontsert zaly men tarıhı-ólketaný murajaıynyń qurylysy bastalady. Dombyra pishindes jańa nysan úshin qurylysy aıaqtalmaı qalǵan kontsert zalynyń nysany buzylady.
Óńirlik kommýnıkatsııalar qyzmetiniń aqparatyna qaraǵanda, qazir qurylys nysanynyń jobalaý-smetalyq qujattamasyn jasaý qolǵa alynǵan.
«Atyraý qalasynda qurylysy toqtap turǵan kontsert zalynyń ǵımaratyn buzý úshin jobalyq-smetalyq qujattama daıyndalyp, saraptamanyń oń qorytyndysy alyndy. Jańa kontsert zaly buzylǵan ǵımarattyń ornyna salynady. Qurylystyń bas jobalaýshysy – «Engeneering Center ltd» JShS kompanııasy. Jańa nysan úshin 5,1 gektar jer telimi bólindi. Nysannyń jalpy aýmaǵy 34 myń 618 sharshy metr. Jobalaýdy 2024 jyldyń úshinshi toqsanynda, qurylys jumystaryn 2026 jyly aıaqtaý josparlandy», - dep habarlady óńirlik kommýnıkatsııalar qyzmeti.
Jańa nysannyń aldynǵy qasbeti dombyra pishindes bolady. Ǵımarattyń eki qabatynda da kontsert zaly qarastyrylǵan. Onyń biri – 1200 oryndyq. Sondaı-aq, murajaı foıesi men ekspozıtsııasyn, horeografııa jáne mýzykalyq stýdııalar ashý josparlanǵan. Qala kórinisin tamashalaý úshin sholý lıftisi ornatylady.
Eske sala ketelik, buǵan deıin Atyraýda kásipkerler úshin quqyqtyq algorıtm ázirlenetinin jazǵan edik.
