Atyraýda dombyra pishindes kontsert zaly qashan salynady
ATYRAÝ. KAZINFORM — Prezıdent 2022 jylǵy qarashada Atyraýǵa kelgen saparynda mádenıet ortalyǵyn salyp, oǵan Qurmanǵazynyń atyn berýdi tapsyrdy. Sodan beri úsh jylǵa jýyq ýaqyt ótse de, jańa nysannyń qurylysy bastalǵan joq.
— Oblystaǵy mádenıet salasyn damytýǵa erekshe nazar aýdarý qajet. Qalada mádenıet oryndarynyń kóbirek bolǵany jón. Men Atyraý qalasynda daryndy jastar úshin mádenıet jáne shyǵarmashylyq ortalyǵyn salýdy tapsyramyn. Ony qazaq kúı óneriniń alyby — Qurmanǵazynyń atymen ataýdy usynamyn, — degen edi Prezıdent.
Munaıly shahardaǵy kontsert zalynyń qurylysy 2012 jyly toqtap qaldy. Jergilikti ákimdik «saqaldy» qurylysqa aınalǵan nysandy qaıta jańǵyrtý úshin ınvestor izdedi.
Sheteldik kompanııalar toqtaǵan qurylysty jandandyrýǵa nıet bildirgenimen kelisim jasalǵan joq.
Keıin jergilikti ákimdik kontsert zalynyń nysanyn saýda ortalyǵyna aınaldyrýdy kózdedi. Bul qadam aıaqsyz qaldy.
Prezıdent Atyraý qalasynyń kórkin buzyp, súıeldeı bolǵan kontsert zalyn synǵa alyp, jańa mádenıet ortalyǵyn salýǵa tapsyrma berdi.
Sodan beri úsh jylǵa jýyq ýaqyt ótse de, jańa nysannyń qurylysy áli bastalǵan joq. Qurylys jumystary qashan bastalatyny ázirge aıtylǵan joq.
Atyraý oblysy ákiminiń baspasóz hatshysy Rýslan Jumaǵazıevtiń usynǵan aqparatyna qaraǵanda jańa nysannyń jobalyq-smetalyq qujaty saraptamada jatyr.
— Jobalyq-smetalyq qujattamaǵa sáıkes kontsert zaly men tarıhı-ólketaný mýzeıi úsh blokqa bólinedi. Birinshi blokta 1200 oryndyq kontsert zaly men bólme qarastyrylyp otyr, — dep habarlady Rýslan Jumaǵazıev.
Bul blokta kórermenderge arnalǵan úlken vestıbıýl, foıe men kýlýarlar, býfetter bolady dep kózdelgen. Eki konferents-zaly bolady. Onyń biri — 100, ekinshisi — 50 oryndyq.
Sondaı-aq 40 oryndyq VIP zal, orkestrge arnalǵan sahna, óner ujymdarynyń repetıtsııa jasaıtyn birneshe zaly men dybys jazý stýdııasy ashylady.
— Al ekinshi blokqa tarıhı-ólketaný mýzeıin ornalastyrý josparlanyp otyr. Keshen quramyna sandyq jáne ǵylymı kitaphana, ǵylymı zerthana, sheberhanalar men muraǵat, qor, kórme, ekspozıtsııalyq jáne konferents-zal kiredi, — deıdi Rýslan Jumaǵazıev.
Mádenıet ortalyǵynyń úshinshi blogy ózgeshe bolǵaly tur. Bul — aldyńǵy eki blokty bir-birimen jalǵastyratyn «Dombyra» monýmentindegi baqylaý alańy.
Munda kassalyq galereıa, monýmenttegi lıfti men baspaldaq alańy bar foıe ornalasady. Ár blokta ákimshilik jáne qosalqy bólmeler qarastyrylǵan.
Eske sala ketelik, budan buryn Atyraýda 11 jyl buryn bastalǵan farmatsevtıkalyq zaýyt qurylysy sol kúıi toqtap turǵanyn habarlaǵan bolatynbyz.