Atyraýda densaýlyq jaǵdaıyna baılanysty 235 adam kólik júrgizý quqyǵynan aıyryldy
ATYRAÝ. KAZINFORM – Atyraý oblysynda bıyl densaýlyq jaǵdaıyna baılanysty 235 adam sot sheshimimen kólik júrgizý quqyǵynan aıyryldy. Qazir taǵy ondaǵan júrgizýshige qatysty materıaldar azamattyq sottyń qaraýynda.
Bıyl polıtsııa departamenti 364 atyraýlyqtyń túrli syrqaty boıynsha dárigerlerdiń arnaıy esebinde turýyna baılanysty kólik aıdaý quqyǵyna baǵa berý úshin materıaldardy sotqa joldaǵan. Qazirgi ýaqytta azamattyq sottar 235 adamdy júrgizýshi kýáliginen aıyrý týraly sheshim shyǵarǵan. Al 51 azamat densaýlyq jaǵdaıynyń kólik basqarýǵa kedergi keltirmeıtinin medıtsınalyq qorytyndymen dáleldep, júrgizýshi quqyǵyn saqtap qalǵan. Taǵy 5 adamǵa qatysty is olardyń qaıtys bolýyna baılanysty toqtatylsa, qalǵan materıaldar sottyń qaraýynda.
Atyraý oblystyq Polıtsııa departamenti ákimshilik polıtsııa basqarmasy protsessıngtik ortalyǵynyń bastyǵy Jeńis Dáýletovtiń aıtýynsha, prokýratýra jylyna bir ret polıtsııaǵa júrgizýshilerdiń densaýlyq jaǵdaıyna qatysty málimet joldaıdy. Osydan keıin talapqa sáıkes kelmeıtin azamattarǵa medıtsınalyq qorytyndysyn usyný jóninde habarlama jiberiledi.
Eger júrgizýshi densaýlyq jaǵdaıynyń kólik basqarýǵa jaramdy ekenin rastaıtyn dárigerlik qorytyndyny usynbasa, polıtsııa materıaldardy azamattyq sotqa joldaıdy.
– Qazir mamandandyrylǵan halyqqa qyzmet kórsetý ortalyqtarynda arnaıy dárigerler jumys isteıdi. Azamattar sol jerde medıtsınalyq tekserýden ótedi. Tekserý qorytyndysy elektrondy bazaǵa engiziledi. Biz sheshimdi sol medıtsınalyq qorytyndy negizinde qabyldaımyz, – dedi Jeńis Dáýletov.
Іshki ister mınıstrligi 2026 jylǵy 25 tamyzdan bastap Qazaqstan Respýblıkasynyń «Jol júrisi týraly» zańyna engizilgen ózgerister kúshine enetinin habarlady.
Vedomstvo ókilderi áń áýeli 65 jastan asqan júrgizýshiler men múgedektigi bar júrgizýshiler eki jylda bir ret mindetti medıtsınalyq tekserýden ótýi qajet ekenin eske saldy.
