Atyraýda demalys kúnderi úsh adam sýǵa ketti
ATYRAÝ. KAZINFORM- Sońǵy eki kúnde Atyraý qalasy men oǵan jaqyn aýmaqtarda úsh adam sýǵa ketti. Ekeýiniń denesi tabylsa, bir adamdy izdestirý jumysy áli jalǵasyp jatyr. Bul týraly Atyraý oblystyq Tótenshe jaǵdaılar departamenti habarlady.
Atyraý oblystyq Tótenshe jaǵdaılar departamentiniń málimetine sáıkes, alǵashqy oqıǵa 26 shilde kúni saǵat 14:34-te Atyraý qalasyndaǵy Munaıshy yqshamaýdany mańyndaǵy avtokólik kópiriniń janynda bolǵan.Oqıǵa ornyna «Marlın» qaıyǵymen eki qutqarýshy jáne mobıldi top jiberilgen. Súńgýirler sýǵa batqan adamdy dereý jaǵaǵa shyǵaryp, jedel járdem qyzmetkerleri alǵashqy medıtsınalyq kómek kórsetken. Alaıda zardap shegýshi esin jımaı kóz jumǵan.
Sol kúni saǵat 16:34-te taǵy bir oqıǵa Jańatalap aýylyndaǵy Jaıyq ózeninde tirkeldi. Belgisiz jaǵdaıda eresek adam sýǵa ketken.
- Ony izdeýge Tótenshe jaǵdaılar departamentiniń 9 qutqarýshysy, 5 qaıyǵy jáne mobıldi toby jumyldyryldy. Іzdestirý jumystaryna marqumnyń týystary men jergilikti turǵyndar da qatysyp jatyr. Qazirgi ýaqytta izdeý jumystary jalǵasýda,-dep habarlady departamenttiń baspasóz qyzmeti.
Al 27 shilde kúni saǵat 00:50-de Atyraý qalasynan shamamen 20 shaqyrym jerdegi Zaroslyı aýyly mańyndaǵy Zaroslyı kanalynda sharýa qojalyǵynyń baqtashysy mal baǵyp júrgen kezde sýǵa ketken. Oqıǵa ornyna Tótenshe jaǵdaılar departamentiniń 3 qutqarýshysy, bir tehnıka jáne bir qaıyq jiberildi. Qutqarýshylar baqtashynyń denesin sýdan shyǵaryp, polıtsııa qyzmetkerlerine tapsyrdy.
Atyraý oblystyq Tótenshe jaǵdaılar departamenti turǵyndardy sý aıdyndarynda qaýipsizdik talaptaryn qatań saqtaýǵa, ruqsat etilmegen jerlerde shomylmaýǵa jáne ózen-kól jaǵasynda saq bolýǵa shaqyrdy.
Tótenshe jaǵdaılar mınıstrliginiń málimetine sáıkes, sýǵa shomylý maýsymy bastalǵaly (1 maýsymnan beri) elimizdiń sý aıdyndarynda 68 adam, onyń ishinde 24 bala sýǵa batqan. Qutqarýshylardyń jedel áreketiniń arqasynda 90 adam, onyń ishinde 23 bala qutqaryldy.
