Atyraýda birinshi surypty un, kúrish pen jumyrtqa baǵasy tómendegen

ATYRAÝ. KAZINFORM – Atyraý turǵyndaryna áleýmettik mańyzy bar 19 túrli azyq-túlik taýary usynylady. Baǵany turaqtandyrý, qoljetimdi azyq-túlikpen qamtamasyz etý maqsatynda monıtorıng qolǵa alynǵan.

Atyraý qalalyq kásipkerlik jáne aýyl sharýashylyǵy bólimi basshysynyń orynbasary Altynaı Erýbaevanyń aıtýyna qaraǵanda, monıtorıng nátıjesinde keıbir azyq-túlik taýarlarynyń baǵasy tómendegen. 

– Atap aıtqanda, birinshi surypty un baǵasy 204 teńgeden 198 teńgege tómendep, 2,9%-ǵa arzandady. Al buryn 519 teńgeden satylǵan S1 sanatyndaǵy 10 dana jumyrtqanyń quny 462 teńgege deıin tústi. Kúrishtiń bir kelisi 432 teńgeden satylyp jatyr. Buryn onyń baǵasy 489 teńge edi, -deıdi Altynaı Erýbaeva. 

Onyń beregine súıensek, áleýmettik mańyzy bar un men jumyrtqa Atyraý qalasyndaǵy kásiporyndarda shyǵarylyp jatyr. Máselen, unmen jergilikti «Karat», «Dáýlet Nan», sondaı-aq «Jelaev astyq ónimderi kombınaty» JShS qamtamasyz etedi. Al jumyrtqany «Dáýlet qus» JShS shyǵarady. Atalǵan qus fabrıkasynyń qýaty – aıyna 4,5 mln jumyrtqa shyǵarý. Al kúrish Qyzylorda oblysy men Reseı Federatsııasynan jetkiziledi. 

– Qazir áleýmettik mańyzy bar azyq-túlikter «Ideal», «Lıder», «Payda» sýpermarketterinde arzan baǵamen satylyp jatyr. Atyraý qalasynyń turǵyndary úshin senbi jáne jeksenbi kúnderi aýyl sharýashylyǵy ónimderiniń jármeńkesi uıymdastyrylady. Jármeńkede jergilikti et, sút ónimderi, kókónister men jemis-jıdekter qoljetimdi baǵamen usynylady. Kásipkerlerge ónimderin satý úshin shatyr, arnaıy kıim, mekeme ataýy jazylǵan tablo tegin beriledi, -dep málim etti Altynaı Erýbaeva.

Eske sala ketelik, buǵan deıin Atyraý oblysynyń turaqtandyrý qorynda 400 tonna kókónis baryn habarlaǵan edik.