Atyraýda birneshe jyl taǵdyry sheshilmegen kópqabatty úsh úı aqyry buzylady
ATYRAÝ. KAZINFORM — Atyraý oblysynyń Isataı aýdanynda 2019 jyly qurylysy bastalǵan, keıin irgetasynan aqaý anyqtalǵan úsh kópqabatty turǵyn úı buzylatyn boldy. Birneshe jyl boıy nysandardy saqtap qalý múmkindigi qarastyrylǵanymen, sońǵy tehnıkalyq qorytyndy nysandardy apatty dep tanyǵan.
Aqqystaý aýylynda 60 páterli úsh turǵyn úıdiń qurylysy 2019 jyly bastaldy. Jalpy quny 3 mlrd teńge bolatyn joba 2023 jyly paıdalanýǵa berilýi tıis bolǵan. Alaıda qurylys birneshe ret toqtap qaldy. Alǵashynda 2020-2021 jyldary merdigerdiń jumysy toqtap, keıin qurylys qaıta jandanǵan. Biraq 2024 jyly ǵımarattardyń irgetasynan aqaý anyqtalyp, jumys taǵy toqtatyldy.
Jyl basynda aýdan ákimi úılerdiń qazirgi jaǵdaıyna qazaq qurylys, ǵylymı-zertteý jáne jobalaý ınstıtýtynyń mamandary kásibı turǵydan baǵalaý jumysyna kiriskenin aıtqan edi.
Qazirgi tańda úsh turǵyn úıdiń bireýi aıaqtalýǵa jaqyn bolǵanymen, ınjenerlik ınfraqurylym júrgizilmegen. Ekinshi úıdiń tóbesi jabylǵan, al úshinshi ǵımarattyń qurylysy úshinshi qabatynda toqtap qalǵan.
— Tehnıkalyq tekseris nátıjesinde irgetas bloktarynyń durys qalanbaǵany, bul ǵımarattardyń kótergish konstrýktsııasyna keri áser etkeni anyqtalǵan. Turǵyn úıler sol sebepten apatty dep tanylyp, qurylysty aıaqtaý jáne nysandy paıdalaný múmkin emes dep sheshildi, — dep habarlady oblys ákimdigi
Osyǵan baılanysty nysandardy buzyp, jańa turǵyn úı keshenin salý týraly sheshim qabyldandy. Sonymen qatar, buzylatyn ǵımarattardan jaramdy qurylys materıaldaryn jańa jobada barynsha tıimdi paıdalaný tapsyryldy.
Buǵan deıin Atyraý oblystyq aýrýhananyń jóndeýi eki jylda nebári 30% jumys oryndalǵanyn jazǵan edik.
