Atyraýda birneshe saǵat boıy toqtaýsyz jańbyr jaýyp, qozǵalys qıyndady
ATYRAÝ.KAZINFORM – Atyraý qalasynda 14 sáýir kúni keshki shamamen 19:00-2:30 aralyǵynda jaýǵan jańbyrdan qala kósheleri men aryqtarda sý jınaldy. Saldarynan adam men kólik qozǵalysy qıyndady.
Qalyptasqan jaǵdaıǵa baılanysty kommýnaldyq qyzmetter jedel áreket etip, kúsheıtilgen jumys rejıminde jumys istep jatyr. Qala bıligi jumys táýlik boıy uıymdastyrylatynyn málimdedi.
– Birinshi kezekte áleýmettik mańyzy bar nysandar – mektepter, balabaqshalar, aýrýhanalar men emhanalar mańyndaǵy aýmaqtar sýdan tazartylady. Basty maqsat – balalar men turǵyndardyń qaýipsizdigin qamtamasyz etý. Qala ákimi barlyq kóshede kólik qozǵalysyna kedergi keltirmeıtindeı jaǵdaı jasaýǵa tıisti tapsyrma berdi. Jaǵdaı tolyq turaqtanǵanǵa deıin, túngi ýaqytty qosa alǵanda, úzdiksiz baqylaý júrgiziledi, – dep habarlady ákimdiktiń baspasóz qyzmeti.
Qazir jańbyr sýyn sorý jáne kóshelerdi tazartý jumysyna 30-ǵa jýyq arnaıy vakýým tehnıkasy jumyldyrylǵan. Mamandar sý jınalǵan ýchaskelerdi kezeń-kezeńimen tazalap, jol qozǵalysyn qalpyna keltirýge bar kúshin salyp jatyr.
Saǵat 3:30-daǵy málimet boıynsha 109 baılanys ortalyǵyna sý sorý jumysyna baılanysty 101 ótinish túsken, onyń 45-i oryndalǵan.
Turǵyndardyń ótinishi 109 biryńǵaı baılanys ortalyǵy jáne ákimdiktiń áleýmettik jelidegi paraqshalary arqyly qabyldanyp jatyr.
Aıta keteıik, 15 sáýirde Atyraý oblysynyń batysy, soltústigi jáne ońtústiginde jańbyr jaýady, al keı jerlerde jańbyr jáne burshaq jaýyp, ekpindi jel turatyny habarlanǵan. Jel soltústik-batystan soǵyp, ekpini 15–20 m/s, keıde 23–28 m/s-qa deıin jetedi.
