Atyraýda birneshe ret túzetilgen «100 aýla» jobasy qashan aıaqtalady

«Avangard», «Leshoz», «Ogorodnyı», «Vokzal mańy», «Almagúl» syndy birneshe yqsham aýdandaǵy 76 úıdiń aýlasyn abattandyrýǵa 3 merdiger mekeme jaýapty. Ákimdik mamandary jyl saıyn «jumys bıyl aıaqtalady» dep sendiredi, alaıda 2022-2023 jyly salynǵan jıektastar qulap, keıbiri synyp jatyr.

Aýla ishine salynǵan joldar da tesile bastaǵan.

Jalpy, joba boıynsha úılerdiń aýlasy adam tanymastaı ózgerýi, tasjoldyń betki qabaty aýystyrylyp, trotýar jańartylyp, oıyn alańdary salynýy, aýlalarǵa jaryq shamdary ornatylyp, kólik qoıatyn oryn aýmaǵy ulǵaıýy tıis. Bul jumys biraz aýmaqta istelgen.

- «Atyraý Kólik» kompanııasynda 35, «Rıgolıt» mekemesinde 28 aýla bolsa, qalǵanyna úshinshi merdiger Sheberbuild jaýapty. Jalpy jumystyń jobasy shıkilikpen jasalǵan. Mysaly, oıyn alańdaryna ornatylǵan qurylǵylar jumys bitpeı jatyp, synyp jatty. Bul sapasy tómen degen sóz. Sondyqtan tózimdi, sapasy joǵary qurylǵylar qoıyp jatyrmyz. Vorkaýttar bar. 2025 jyldyń sońynda úsh mekemeniń jobasy tolyq túzetildi, - dedi qala ákiminiń orynbasary Tilek Mahýov.

Onyń aıtýynsha, bul joba aıasyndaǵy barlyq jumysty kúzge deıin aıaqtaý josparlanyp otyr. Alǵashynda joba quny 6,7 mıllıard teńge bolǵan, biraq túzetýler men ózgeristen keıin quny ósken.

Qalalyq ákimdik málimetinshe, keı aýlalardyń jobasy saraptamadan endi ótkendikten, ósim kólemi eseptelip jatyr.

- Qarjydan másele týyndamaıdy. Qurylys jumystaryn júrgizýge order alyndy. Merdigerler jumystaryn bastap jatyr. Salyqtardyń kólemine, qymbatshylyqqa baılanysty joba quny ózgerdi, - dedi qala ákiminiń orynbasary Tilek Mahýov.

Sheneýnikterdiń sózinshe, nysandy qabyldaý kezinde barlyq talap eskeriledi, synǵan tósemtas nemese bordıýr bolǵan jaǵdaıda merdiger tarapynan aýystyrylady.

Buǵan deıin Atyraýda káriz jelisin salýǵa arnalǵan 23 jobaǵa 80 mlrd teńge qajet ekenin jazǵan edik.