Atyraýda birneshe mekemeniń qaraýynda bolǵan retro-saıabaqty jóndeýge 564 mln teńge qajet
ATYRAÝ. KAZINFORM – Atyraý qalasynyń týǵan kúnine oraı 9 jyl buryn paıdalanýǵa berilgen retro-saıabaq búginde jóndeýge suranyp tur. Mundaı sheshimdi sheneýnikter qabyldady. Bir kezderi munda amfıteatr, retro stılindegi dámhana, kórme pavılony, jaryqpen bezendirilgen sýburqaq pen jasandy toǵan bolǵan. Qazir saıabaqty qaıta jańǵyrtý úshin 564 mln teńge qajet.
Atyraýdaǵy retro-saıabaq 2017 jyly qalanyń 377 jyldyǵyna oraı ashylǵan. Demalys ornynyń jobasynda amfıteatr, 90 oryndyq dámhana, kórme pavılony, áýenmen jáne túrli tústi jaryqpen kómkerilgen sýburqaq, jasandy toǵan sekildi nysandar qarastyrylǵan. Saıabaq ashylǵan kezde onyń aýmaǵyna júzdegen tal egilgen. Jasyl jelek kóbeıip, birneshe jyldan keıin botanıkalyq baqqa uqsaıtyn demalys orny bolady degen jospar bolǵan.
Alaıda jyldar óte kele saıabaqtaǵy birqatar nysan isten shyǵyp, bastapqy kelbeti ózgerdi. Sonyń biri – jasandy toǵan men sýburqaq. Joba boıynsha ol túrli tústi jaryqpen bezendirilip, áýen yrǵaǵymen jumys isteýi kerek bolǵan. Qazir bul aýmaqta sýburqaqtyń orny ǵana qalǵan.
Retro saıabaqty kútip ustaý alǵashynda qalalyq ákimdik janynan qurylǵan kommýnaldyq kásiporynǵa júktelgen edi. Keıin nysan senimgerlik basqarýǵa berildi. Alaıda ákimdik pen kásipker arasyndaǵy kelisim buzylyp, 2022 jyldan beri saıabaq qalalyq TÚKSh jáne turǵyn úı bóliminiń balansynda.
3 jyl buryn saıabaqtaǵy sýburqaqty qalpyna keltirýdi josparlaǵan. Ol úshin 21 mln teńge qarastyrylatynyn aıtqan. Alaıda josparlanǵan jumys júzege aspaı qaldy.
Endi bıyl saıabaqty qaıta jańǵyrtý kózdelip otyr. Joba aıasynda tósemtastar men jaryq shamdary aýystyrylyp, kógal tóseledi. Sondaı-aq jasandy toǵandar qaıta jańǵyrtylady.
- Osy jumys boıynsha bólim qalalyq máslıhatqa tıisti bıýdjettik ótinim joldady. Tıisti qarajat kóziniń bólinýine qaraı jeńimpaz merdiger mekemeni anyqtaý maqsatynda memlekettik satyp alý portalyna ashyq elektrondy konkýrs jarııalanyp, jeńimpaz anyqtalǵannan keıin jumys júrgiziletin bolady, – dedi Atyraý qalalyq TÚKSh jáne turǵyn úı ınspektsııasy bóliminiń sektor meńgerýshisi Máýlen Salamatov.
Mamandardyń málimetinshe, saıabaqtaǵy kógal jabyndysynyń jalpy aýmaǵy 16,5 myń sharshy metr. Onyń 9 myń sharshy metrine gazon ósirilgen.
Eske salaıyq, Nursaıa yqshamaýdanynda salynýy tıis 4,8 mlrd teńgelik saıabaqtyń qurylysy jobaǵa engizilgen túzetýlerge baılanysty toqtap tur.
