Atyraýda bir jylda tutynýshylardyń 36 mln teńgesi keri qaıtaryldy

ATYRAÝ. KAZINFORM — Byltyr Atyraý oblysynda tutynýshylarǵa 36 mln teńgesi keri qaıtarylǵan. Buǵan olar túsken 1 101 aryz sebep bolǵan. 

Atyraý oblystyq saýda jáne tutynýshylardyń quqyqtaryn qorǵaý departamentiniń basshysy Álem Ýálıevtiń málimetinshe, tutynýshylardan 701 jazbasha, telegram bot arqyly169, jedel jelige 79 aryz túsken.

Al, 152 aryzdy departament basshysy men mamandary qabyldaǵan. 

«Tutynýshylardyń aryzdaryna baılanysty jospardan tys 16 tekserý taǵaıyndaldy. Nátıjesinde kásipkerlik sýbektilerine qatysty 14 eskertý túrindegi ákimshilik jaza qoldanyldy. Qysqartylǵan tártippen 2 ákimshilik aıyppul salyndy. Jalpy somasy 138 myń teńgeni quraıtyn aıyppul memleket paıdasyna óndirildi. Aryzdardy qaraý jáne konsýltatıvtik kómek kórsetý arqyly tutynýshylarǵa 36 mln teńgeden astam qarjy keri qaıtaryldy», — deıdi Álem Ýálıev.

«Qara Shańyraq Qazaqstan» qoǵamdyq birlestiginiń basshysy Lýgzana Baılaýovanyń aıtýynsha, 2019 jyldan beri tutynýshylardyń quqyǵyn qorǵaýdyń biryńǵaı júıesi — e-tutynushy.kz servıstik platformasy jumys istep tur. 

Atalǵan platforma tutynýshylardyń quqyǵyn qorǵaý jónindegi ótinishterdi jedel qaraýǵa jáne zańnama normalaryn túsindirýge arnalǵan. 

«Platformanyń basty maqsaty — týyndaǵan máselelerdi jedel sheshý maqsatynda azamattar men bıznes, qoǵamdyq uıymdar men tutynýshylardyń ómir súrý sapasyn jaqsartý. Servısti derbes kompıýter jáne mobıldi telefon arqyly qoldanýǵa bolady» — dedi Lýgzana Baılaýova.

Eske sala ketelik, buǵan deıin Atyraýda básekelestikti qorǵaý zańnamasyn buzǵandardan 690 mln teńge óndirilgenin jazǵan edik.