Atyraýda bir jylda 22 jasóspirimge qatysty 11 qylmystyq is qozǵalǵan

Atyraý qalasynda byltyr ishki ister organdaryna ákimshilik jáne qylmystyq quqyq buzýshylyqqa baılanysty 3 682 jasóspirim jetkizilgen. Onyń ishinde 22 jasóspirimge qatysty 11 qylmystyq is qozǵalǵan, dep habarlaıdy Kazinform.

Atyraý qalalyq polıtsııa basqarmasy ıývenaldy polıtsııa tobynyń bastyǵy, polıtsııa maıory Elvıra Imanǵazıevanyń aıtýynsha, jasóspirimderdiń qatysýymen jasalǵan qylmystar 14 paıyzǵa tómendegen. Alaıda, kámeletke tolmaǵandarǵa qarsy jasalǵan qylmys 20 paıyzǵa, al jynystyq tıispeýshilik qylmysy 45 paıyzǵa ósken.

«Atyraý qalasy boıynsha ishki ister organdaryna ártúrli ákimshilik jáne qylmystyq quqyq buzýshylyq jasaǵan 3682 jasóspirim jetkizildi. Kámeletke tolmaǵandardyń quqyǵyn qorǵaý jónindegi komıssııaǵa 99 qujat joldandy. Komıssııa sheshimimen 10 ata-ananyń quqyǵy shekteldi. Al, 3-eýi ata-ana quqyǵynan aıyryldy. Qańǵybastyqpen aınalysqan 2 qyz 6 aı merzimge Aqtaý qalasyndaǵy mektep ınternatqa ornalastyryldy. Buzaqylyq jáne qasaqana aýyr dene jaraqatyn keltirý deregimen 22 jasóspirimge qatysty 11 qylmystyq is qozǵaldy. Onyń ishinde 3 jasóspirimge qatysty ister sotqa joldanyp, olarǵa 1 jyldan 2 jylǵa deıin shartty túrde jaza taǵaıyndaldy», - dep habarlady Elvıra Imanǵazıeva.

Eske sala ketelik, budan buryn Atyraýda taǵdyry qıyn 200-ge jýyq kámeletke tolmaǵan bala baryn habarlaǵan edik.