Atyraýda bir kúnde árqaısysy 290 oryndyq úsh balabaqsha qoldanysqa berildi
Atyraýda bir kúnde mektepke deıingi tárbıe beretin úsh balabaqshanyń nysany paıdalanýǵa berildi, dep habarlaıdy Kazinform.
Jańa balabaqshanyń biri – Atyraý qalasyna irgeles ornalasqan Aqjar-2 eldi mekeninde ornalasqan «Aqjelken». Al, «Bolashaq» jáne «Báıterek» balabaqshalary munaıly shahardyń A.Baıtursynov pen Belınskıı kóshesinde ashyldy. Ár balabaqsha 290 orynǵa arnalǵan.
«Memleketimizdiń basty ustanymy – balalarǵa sapaly bilim, sanaly tárbıe alýyna qolaıly jaǵdaı jasaý. Prezıdenttiń balabaqsha men mektepterdiń sanyn kóbeıtý jónindegi tapsyrmasyna oraı oblystaǵy balabaqsha sanyn kóbeıtip jatyrmyz. Aldaǵy bes jylda 2-6 jastaǵy balalar úshin 8 myńǵa jýyq orny bar bóbekjaılar salýdy josparlap otyrmyz. Balalarǵa sapaly bilim men ulttyq tárbıe beretin osyndaı jobalar ary qaraı da jalǵasady», -dedi oblys ákimi Serik Shápkenov.
Balabaqshalardaǵy ashana, jatyn bólme, oıyn, logoped jáne psıholog, pedagogter bólmeleri, sport zaly zamanaýı qural-jabdyqtarmen qamtylǵan. Ashanadaǵy taǵamdar sanıtarlyq talapqa saı tońazytqyshtarda saqtalady. Al dáriger bólmesinde balalarǵa alǵashqy kómek kórsetýge qajetti dári-dármektiń bári bar.
Ár balabaqshada 26 adam jumys isteıdi. Al, balalar 12 top ashylǵan. Onda balalar kishi jáne úlken toptarǵa bólinedi.
«Osy kezge deıin memleket-jekemenshik áriptestigi aıasynda 870 oryndyq úsh balabaqsha ashyldy. Jyl aıaǵyna deıin taǵy da 890 balany qamtıtyn úsh balabaqsha ashylyp, qajettilik 15,2 paıyzǵa azaıady», -dedi Serik Shápkenov.
Eske sala ketelik, buǵan deıin Qulsary qalasynda úsh jyl salynǵan 75 oryndyq aýrýhana ashylǵanyn jazǵan bolatynbyz.
